Lòt sền gùt dar ală hìu ràng tăc phan, drà pa mờ drà tàm ƀòn dờng Buôn Ma Thuột, càr Dăk Lăk gơtùi sền gŏ geh nùs nhơm Sa tềp duh hồl hô hơng ngan. Ală cau kă phan mờ drà pa neh bơka, ơn pơdơng ală bơta phan pal geh drơng làng bol in tàm dơ̆ Sa tềp. Gam săc rwah phan nàng blơi drơng Sa tềp tàm hìu ràng tăc phan tàm gùng Nguyễn Văn Cừ, bi Trần Thảo Nguyên, ơm tàm sơnah ƀòn Tân Lập, ƀòn dờng Buôn Ma Thuột, đơs: “Phan bơna Sa tềp nam do li la, rơ̆ ru, giă tăc blơi gơ dipal. Sa Tềp rơ̆p blơi tai dồ êt ƀañ kèu, dồ êt phan pà, ƀièr hơ̆ sồng dà lơngồt mờ ală phan sa neh ơn lài tàm hồp nàng lòt pà mè bèp in, Sa tềp ồng mò mơi wa lŏ kồñ in. Hìu bơnhă añ kung gam blơi bè ờs sơl bè ală nam mờ ờ gŏ ơn prăp bơta lơi ờ, tài bơh tŭ do drà tŭ lơi kung pa kung bơkah lơm”.

Tàm drà Tân An, dùl tàm anih drà dờng bơh ƀòn dờng Buôn Ma Thuột dê, ală cau kă phan neh ơn pơdơng han bơna kă bro drơng Sa tềp in bơh gờñ ngan, gờñ rlau mờ ală nam lài. Bi Đồng Thị Thanh Trúc, cau kă phan tăc ƀañ kèu, pà gĭt, nam do bi neh blơi bơnah phan gơguh 30% pơndrờm mờ nam lài mờ ràng tăc bơh bồ nhai 12.

Tàm ală drà pa mờ ală hìu ràng tăc phan dờng, bơnah phan bơna kă bro drơng Sa tềp in kung geh rơcăng lài bơh gờñ ngan. Bơh broă mblàng sền bơta drà kă bro mờ lơh sa tàm nam 2024, ală mpồl lơh broă neh tơngguh bơnah phan blơi nàng tăc wơl bơh 30% tus 50% pơndrờm mờ nam lài. Bi Lê Xuân Hoan, ătbồ ală hìu ràng tăc phan dờng tàm càr Dăk Lăk pà gĭt: Mpồl lơh broă neh rơcăng bơnah phan bơna gơguh 50% pơndrờm mờ Sa tềp nam Giáp Thìn. Bơdìh mờ broă rơcăng ală phan bơna mờ tăc tơrmù giă, nam do, ală cau tăc phan rah rài is ồn sền gròi tus broă gàr geh bơta niam phan bơna, ngan là tơnơ̆ dơ̆ khuah hòn ờ niam geh gŏ tàm drà tờm mờ bàr pe hìu ràng tăc phan.

“Ală phan sa prăp phan bè lơh jăt di ală broă lơh niam sàng goh phan sa. Bơnah ơn prăp rê uă mơya ờ gŏ jun tus uă ir tàm hìu ràng tăc phan, geh hìu prăp phan dờng tàm tiah lơh sa mờ măy mŏk Tân An, jơh hơ̆ sồng jun rê”.

Nàng gơhòi gơ jà jơnau kờñ ngui sa tàm dơ̆ Sa tềp, ală drà pa gam lam lơh uă broă lơh tăc phan ai pà, tơrmù giă lơh gơkờñ ngan. Bal mờ hơ̆, ală drà pa kung neh bơtơl cau lơh broă mờ tơngguh tai giơ drơng broă, mờ broă pờ mpồng gờñ mờ til mpồng jơla rlau mờ bè ờs tàm bàr poh lài mờ Sa tềp. Jăt mò Trần Thị Thành Nhân, Phó Kwang Lam bồ drà pa Co.opmart Buôn Ma Thuột yal, bơnah phan kă bro drơng Sa tềp tàm drà pa gơguh bơh 30 tus 50%, tàm hơ̆ phan Việt Nam geh tus 90%. Drà pa jăt ngui broă lơh tăc pà phan, tơrmù giă gĭt nđờ rbô bơta phan bơh ngai 01/12/2024 tus ngai 28/01/2025.

 “Mpồl lơh broă ơn prăp khà phan kă bro tàm 2 nhai kă bro dơ̆  Sa tềp rlau 80 tơmàn đong, tàm hơ̆ mpồl phan gàr niam giă rlau 20% mờ mpồl lơh broă tơrgùm tàm ală mpồl phan bè phan sa geh gar, ală bơta phan trŭ gơm sin, puăc phan puan jơng, phan bàr nơm jơng, ală bơta phan biăp bùm kơnuh plai đo mờ ală bơta phan sa mùl gŏ is ngai Sa tềp dê bal mờ giă ờ gơguh tàm dơ̆ lài mờ tơnơ̆ dơ̆ Sa tềp nàng drơng jơnau kờñ blơi prăp bơh cau ngui sa dê”.

Nàng gàr niam kơ̆ kơl jăp drà kă bro tàm dơ̆ lồi sơnam mờ Sa tềp bơhiàn dà lơgar dê nam Ất Tỵ 2025, Anih duh broă Làng bol càr Dăk Lăk neh ai lơh jăt Broă rơndăp lơh ơn prăp phan bơna kờñ pal geh. Tŭ do, 11 mpồl lơh sa kă bro dờng neh rơcăng bơnah phan kờp priă rlau 507 tơmàn đong, lơh geh pơgăp 36,4% jơnau kờñ ngui sa bơh làng bol dê. Ală bơta phan gàr niam giă geh, phan sa geh gar, phan sa neh trŭ gơm lài, puăc phan puan jơng, bàr nơm jơng, tơngi sa, sơdàng, ƀòk ngòk, biăp bùm kơnuh plai đo, mờ xăng zờu. Broă gàr niam giă rơ̆p geh lam lơh bơh ngai 15/12/2024 tus ngai 28/02/2025. Ồng Lưu Văn Khôi, Kwang Lam bồ Sở Lơh sa mờ Măy mŏk mờ Kă bro phan càr Dăk Lăk pà gĭt, bal mờ gàr tơl bơnah phan, broă lơh lòt sền, sok sền drà tăc blơi phan Sa tềp geh ală mpồl lơh broă geh gơnoar lam lơh dòt ròt: “Bol hi rơ̆p pơn jăt tai jăt sền bơta tam gơl tàm drà kă bro mờ di tŭ geh ală broă lơh drơng nàng kờñ gàr bơnah tăc kơ̆ kơl jăp, mơkung pơn jờng ală mpồl lơh sa kă bro lơh pràn lơh sa, bơtàu ală mpồl tăc phan, drơng jơnau kờñ blơi prăp bơh làng bol dê”.

Bal mờ bơta rơcăng lài nền nòn bè bơnah phan, broă lơh tăc pà phan mờ gàr geh bơta niam phan bơna, drà Sa Tềp bơhiàn dà lơgar nam Ất Tỵ 2025 tàm càr Dăk Lăk neh crăp rơcăng lơh geh jơnau kờñ blơi prăp phan bơh làng bol dê.