Drim ngai 14/01, tàm Hà Nội, Thủ tướng ồng Phạm Minh Chính đơng lam Pơrjum dơ̆ 05 Mpồl duh broă pơgồp bal đơng lam Tiah ring dà dờng Hồng. Jăt jơnau yal, nam 2024, lơh sa- mpồl bơtiàn bơh tiah ring dà dờng Hồng dê pơn jăt tai bơtàu tơngguh pràn kơldang, sùm lòt lài tàm lơh jăt ală tam gơl pràn kwơmàng mờ tam gơl pa broă lơh tơrlòng lài gơguh; gơguh lơh sa sơrlèt khà kờp bal bơh jơh gùt lơgar dê mờ sơrlèt rlau tiah đah jum măt tơngai Lik dà lơgar; pơn jăt tam lam bồ bè rề kes priă dà lơgar, tăc phan mờ lơgar ndai, gơhòi gơ jà bơcri priă lơgar ndai.

Đơs tàm pơrjum, Thủ tướng Cíñ phủ ồng Phạm Minh Chính đơs sùm, tơngai tus, tiah ring dà dờng Hồng pal gơguh 2 nơm khà nàng bal mờ jơh gùt lơgar mŭt tàm rài pa bè pơlam gùng bơh Tổng Ƀí thư ồng Tô Lâm dê. Den tàng bè hơ̆, Mpồl duh broă tơrgùm đơs ală broă neh lơh geh, ờ hềt lơh geh, kờp sền nền wơl, mblàng sền jơnau bơh tài gơbàn, jơnau bơsram mờng chài ai geh tàm ală tŭ đơng lam bơh ală ƀộ, gah, tiah dê; bơh hơ̆ gàr niam ală bơta lơh geh, bơsong ală bơta ờ hềt dipal, kal ke, gơkòl, jòi gùng tă bơsong. Thủ tướng sồr pal jơh nùs pal jơnhoa, lơh ngan pal dờng, lơh broă pal kràñ cê jơh nùs, geh di broă, di anih, lơh broă lơi sir broă hơ̆.