Mờ tơngume “Rbàng tàm tơrbŏ- Mpồl lơh sa kă bro- Brồ guh ngài”, pơrjum nam do geh rlau 20 dar pơrjum bơyai, tơrgùm tàm ală broă gam geh mpồl bơtiàn is ồn sền gròi.

Đơs tàm pơrjum, Củ tịc lơgar đơs sùm, tơnơ̆ mờr 40 nam lơh broă lơh tam gơl pa, Việt Nam neh lơh geh cồng nha kwơ màng, geh gơtha kah yau, lơh geh ală bơta kơnhăp kơ̆ ai bơtàu tơnguh tam gơl pràn bơh Dà lơgar dê nàng bal mờ dunia cơnđoà mut tàm rài pa. Hơ̆ là ală kơrnoat boh lam, broă lơh ngai sơlơ lơh sir jat jơnau sồr ală lơgar dê; dùl rài lơh sa ngăc ngar, mut gơrờm bal jrô ơnàng làm uă; dùl rài cíñ trị- mpồl bơtiàn kơ̆ kơl jăp; mờ ală mpồl lơh broă bal ală lơgar glòm jơh gùt kơnhoàl ù tiah. Ală cồng nha do lơh geh là kơnờm tàm ală broă lơh di pal, mpàng tê, bồ tơngoh kơlôi sơnơng mờ nùs nhơm lơh broă ờ bòl glar bơh jơh tơl nă làng bol, bơta kờñ mờ lơh broă bal dờng màng ngan bơh bơyô ală lơgar dê.