Đơs pơn dut tàm dơ̆ pơrjum, Củ tịc lơgar ồng Lương Cường đơs niam bơta lơh ngan bơh Cơldŭ lơh broă Củ tịc lơgar dê tàm tŭ tơngai broă tàm dunia mờ tàm tiah do pơn jat tai gơlik geh kal ke; tàm lơgar, broă lơh gơnoar atbồ ƀòn lơgar 2 kâp tơnơ̆ 2 nhai lơh broă bơh sơn đờm neh lơh geh cồng nha; ală càr, ƀòn dờng, mpồl, ƀộ, gah lơh broă tơrgùm lam lơh pơrjum dờng Đảng ƀộ ală kâp.

Bè broă rơndap lơh, kơnòl broă tàm tơngai tus, Củ tịc lơgar đơs là khà broă ai tơlik dờng ngan sồr Cơldŭ lơh broă Củ tịc lơgar pal ngui uă ngan rlau jơh pràn jak, lơh broă ngac ngar, jat nùs nhơm crăp rơcang nàng lam lơh kơnòl broă kơlôi sơnơng, tă pơgồp jơnau đơs, drơng broă Củ tịc lơgar; Phó Củ tịc lơgar tàm ală broă tàm lơgar, lơh broă mờ lơgar ndai; di tŭ tă pơgồp ală tơngume di mờ bơta geh ngan, geh bơta niam uă, gàr tŭ tơngai hơ pơrgon mờ bơta niam broă lơh, kuơmàng tàm ală broă kuơmàng bè broă tàm lơgar, lơh broă mờ lơgar ndai tàm dơ̆ tơngkah 80 nam Kac màng nhai 8 mờ Sơntờm dà lơgar 02/9.