Mho ngai 10/09, tàm Hìu duh broă Củ tịc, Củ tịc lơgar ồng Lương Cường mờ Pơ ùr neh đơng lam Dơ̆ bơyai lơh wă rò dờng ki ngàm ngan Cau ala măt gơnoar ătbồ lơgar Australia mò Sam Mostyn mờ Bơklau lòt còp kâp Dà lơgar tus Việt Nam. Tơnơ̆ dơ̆ bơyai lơh wă rò ngan ngồn tơn, Củ tịc lơgar ồng Lương Cường neh pơrjum bơyai mờ Cau ala măt gơnoar ătbồ lơgar Australia mò Sam Mostyn. Bàr đah đơs là broă tơngguh broă gĭt gơ̆p gơguh tus Tam klăc lơh broă bal Jŏ jòng Tơl làm nhai 03 nam 2024 là dùl broă gơguh jak kah yau, ai gĭt gơ̆p 2 gah bơtàu tơngguh pràn kơldang. Bàr lơgar là ală lơgar tam klăc lơh broă bal kă bro phan dờng bơh gơ̆p dê mờ priă geh bơh kă bro phan geh rlau 14 tơmàn dolar Mỹ nam 2024, khà năc lòt nhơl 2 đah gơguh sùm bơh ală nam. Ală mpồl lơh sa kă bro lơgar Australia dê neh mờ gam geh ai tơl bơta ƀươn nàng bơtàu tơngguh bơcri priă kă bro tàm lơgar Việt Nam. Việt Nam neh jơh nùs gơgơs là cau lơh kòn gùng nàng Australia in tơngguh tai tam klăc lơh broă bal mờ kơnhoàl ù tiah đah Jum măt tơngai Lik câu Á, pơgồp bơnah tơngguh gĭt gơ̆p Tam klăc lơh broă bal Jŏ jòng Tơl làm Australia mờ Asean mờ lơh broă bal ngan ngồn đah Australia mờ Tiah dềt Mekong.

Cau ala măt gơnoar ătbồ lơgar Australia mò Sam Mostyn đơs niam ngan tă pơgồp kwơmàng bơh mpồl bơtiàn pơgăp 350 rbô nă cau Việt Nam tàm lơgar Australia mờ mờr 40 rbô nă cau bơsram dờng Việt Nam gam bơsram, kơlôi sơnơng tàm lơgar Australia; đơs sùm tìp măt lơh kwèng làng bol jrô ơnàng là bơnàng jă kơ̆ kơnhăp bơh gĭt gơ̆p 2 gah dê. Bàr đah dùl nùs ring bal lam lơh pràn kơldang rlau tai ală broă lơh nàng tơngguh tai lơh broă bal lơh sa 2 gah, wèt tus jơnau kờn priă geh bơh kă bro phan 20 tơmàn dolar Mỹ mờ gơguh tus bàr dơ̆ bơcri priă 2 gah tàm ală nam tus. Australia pơn jăt tai pơgồp bal niam, kờñ bal nùs nhơm pal jăt bơh Việt Nam mờ Asean dê tàm sền gàr lơngăp lơngai, niam lơngăp lơngai mờ khăt gơboh gùng dà lềng, gùng rơndeh par tàm dà lềng đah măt tơngai Lik; bơsong tam pìt tam phà bơh ală broă lơh ring lơngai jăt tàm bơta ki ngàm bal adăt boh lam ală lơgar dê.