Tàm sră pơyua geh gơl cih: “Sa tềp Trung thu bơh nđờ rài do neh gơ gơs là bơta niam ờ gơtùi ờ geh tàm rài kis niam chài bơh cau Việt Nam he dê. Do là tŭ nàng ală sau chờ hờp nhơl ñŏ, bơ tòm tơrgùm mat bal mờ hìu bơnhă, gơp bơyô. Đảng, Dà lơgar mờ jơh gùt mpồl bơtiàn sùm lời ai bơta sền gròi uă ngan ai ală sau in, sùm lơh gơlik tơl bơta niam ngan rlau jơh nàng ală sau in geh bơsram sră, pơlam tàp, nhơl ñŏ lơngăp lơngai mờ dờng pràn tơl làm. 

Wa kơp kờñ ală sau sùm gàr kơ̆ nùs nhơm kờñ bơsram, sùm gơ lòng sồr, tam klac bal, kờñ gơboh mờ tam pà bal, dong kờl bal mờ gơp gơguh jak, bal mờ gơp dờng pràn, nàng tă pơgồp bơta pràn bơt bơtàu dà lơgar Việt Nam kờñ gơboh bol he dê ngai sơlơ pas sơm, niam bơnĕ, gơguh jak. Di sa tềp Trung thu nam 2025, wa pơyua tus jơh ală sau bơta pin dờn, kờñ gơboh, kơp kơnờm. Nting bơr ală sau wă rò dùl Trung thu geh kuơ, lơngăp lơngai, ram mhŭ bal mờ hìu bơnhă, pơgru mờ gơp bơyô. Wa kơp kờñ ală sau ờ bơtuah, ală sau tàm tiah dà kŏ dà cò lơh aniai rơp sùm pơnđơl pràn, bañ ruc wơl tềng đap ală kal ke, ală sau gàr tĕ sùm săp ñŏ niam bơnĕ, sòl pơnđàng ală bơta kơp kờñ niam bơnĕ, nàng tơnơ̆ dơ̆ mìu càl rbut dờng den rài kis gơ rơp bềng lìu wơl bơta àng mờ chờ hờp.