Tơnơ̆ tŭ iat ală jơnau đơs, jơnau dan bơh cau tĕ khà dê, đơs tàm pơrjum, Củ tịc lơgar ồng Lương Cường pà git, Dơ̆ pơrjum dơ̆ 10, Quôk hội khoă XV tus do là dơ̆ pơrjum lồi tơngai lơh broă, geh gơtha kuơmàng ngan, ờ mìng tơn jơh broă lơh jơh gùt tơngai lơh broă mờ gam ai tơlik lài gùng dà broă lơh ai tŭ tơngai bơtàu tơnguh pa in; tàm hơ̆ Quôk hội rơp sền swì, lơh nền uă broă kuơmàng, tàm hơ̆ geh mờr 50 rơndap lơh adat boh lam, jơnau lơh nền tàm pơrjum mờ 13 mpồl tơngume dờng bè lơh sa – mpồl bơtiàn bal mờ uă broă kuơmàng ndai. Đơs sùm tơl cồng nha dà lơgar, ƀòn dờng dê ndrờm geh bơta tă pơgồp dờng màng ngan bơh làng bol dê. Củ tịc lơgar kơp kờñ làng bol pơn jat tai đòm jat bơhiàn kac màng kơ̆ dơn, tam klac bal, dồ nùs bal mờ gùt lơgar, at tê bal bơt bơtàu ƀòn dờng Hồ Chí Minh gơguh jak, tam gơl pa, bềng lìu nùs nhơm niam; bơt bơtàu dà lơgar he ngai sơlơ bơtàu tơnguh, pràn kơldang, ndrờm bal mờ gơp bơyô ală lơgar bè Wa Hồ kờñ gơboh neh kơp kờñ.