Bàr kwang đơng lam bồ tơlik nùs nhơm chờ hờp tềng đăp mờ ală bơta gơguh niam tàm bơta git gơ̆p đah bàr lơgar dê, ring bal pơn jăt tai lơh nền nòn rơlao bơta git gơ̆p Tam klăc bal, lơh broă bal jŏ jòng tơl ală bơta, wèt tus bơ̆t bơtàu Mpồl bơtiàn tam pà bal rài tơnơ̆ do đah lơgar Việt Nam mờ lơgar Lo.

Củ tịc lơgar ồng Lương Cường sồr tơnguh broă tìp bal kấp dờng, lơh pràn lơh broă bal mùl màl tàm ală gah broă: Bơta chài-măi mok, tam gơl pa, bơceh lơh, bơto cau lơh broă geh bơta niam uă, tơrbŏ bal gùng lòt jŏ jòng, lơh broă bal lơh sa-kă bro phan, bơto bơtê mờ lòt nhơl. Ồng Tập Cận Bình đơs ngan pal gờñ bơyai lơh Dơ̆ pơrjum sơnrờp ngan bơh Anih duh broă tơrgùm bal lơh broă bal gùng rơndeh ồs, mờ lơh pràn tìp bal kấp dờng, tam gơl bal broă mờng chài bơ̆t bơtàu Đảng, atbồ dà lơgar. Bàr gah kung ring bal lơh jăt ală broă lơh tàm Nam tìp bal di tơnkah 75 nam crơng gơs git gơ̆p cri bơyai broă mờ lơgar ndai.