Tàm dơ̆ tìp mat, 2 nă kwang đơng lam bồ jờng rơ ală cồng nha niam ngan bơh bơta git gơp Lơgar lơh broă bal jŏ jòng tơl làm Việt Nam - Mỹ tàm tơngai lài. Bàr gah ring bal pơn jat tai pơgồp bal jơh nùs nàng kờñ ai bơta git gơp bàr lơgar ngai sơlơ bơtàu tơnguh bè bơta niam, ngan ngồn, kơljap sùm mờ kơnhăp jŏ, dipal mờ bơta kuơ bơh làng bol 2 lơgar dê, tă pơgồp uă ngan ai ring lơngai, lơh broă bal mờ bơtàu tơnguh kơnhăp jŏ tàm tiah do mờ tàm dunia.

Bè đah să tờm Kwang atbồ lơgar Mỹ, ồng đơs nền, sền dờng màng bơta git gơp Lơgar lơh broă bal jŏ jòng tơl làm mờ Việt Nam; jờng rơ gơnoar broă, bơngă ngai sơlơ dờng bơh Việt Nam dê kung bè ală broă lơh ngan bơh Việt Nam dê bè tam gơl wơl, pờ mpồng, mut gơ rờm bal, tam gơl lơh sa pràn kơldang. Đơng lam lơgar Mỹ đơs nền tò dong gơnoar broă lơh tờm bơh ASEAN dê, đơs niam bơta tă pơgồp bơh Việt Nam dê ai ală broă tàm tiah do mờ ală lơgar.