Drim òr (03/09), lơgar Lo bơyai lơh Dơ̆ sền swì bơta pràn jak ling klàng tơnkah 80 nam tam lơh pha lin bơh làng bol dunia dê tàm Ƀlàng dờng Thiên An Môn tàm càr lơgar Bắc Kinh. Dờp jơnau jà bơh Tổng Ƀí thư Đảng Kộng sản lơgar Lo, Củ tịc lơgar Lo ồng Tập Cận Bình, Củ tịc lơgar ồng Lương Cường bal mờ mpồl kwang bàng ala măt kấp dờng lơgar Việt Nam tus Dơ̆ bơyai lơh tơnkah.

Đơs chờ gờm tàm dơ̆ tơnkah, Tổng Ƀí thư, Củ tịc lơgar Lo ồng Tập Cận Bình tơlik nùs nhơm ưn ngài broă lơh bơh ală cau ling yau neh tus bal tam lơh, kung bè broă kờñ bal bơh ală lơgar kờñ mờ bơta ring lơngai tàm dơ̆ tam lơh mờ phát xít. Pơn jăt mờ hơ̆, dơ̆ ai ling lòt pơdar dờng geh bơyai lơh mờ broă tus bal bơh uă bơta phào crong pa tàm Ling Tơnklàs Làng bol lơgar Lo, tàm hơ̆ geh 45 mpồl tơrgùm jăt gùng Trường An. Lài mờ hơ̆, Củ tịc lơgar ồng Lương Cường neh tus bal Dơ̆ wă mờ kŭp rùp bal mờ ală Kwang lam bồ mpồl tus bal Tơnkah 80 nam tam lơh pha lin phát xít bơh làng bol dunia dê geh Tổng Ƀí thư, Củ tịc lơgar Lo ồng Tập Cận Bình đơng lam.