Tàm dơ̆ wă, Củ tịc lơgar đơs nền Việt Nam sùm sền gròi bơ̆t bơtàu pràn kơldang gĭt gơ̆p lơh bơyô mờ lơgar Thổ Nhĩ Kỳ tài bơta kwơ bơh làng bol bàr lơgar, kung bè tài ring lơngai, kơ̆ kơl jăp, lơh broă bal mờ bơtàu tơngguh tàm tơl kơnhoàl ù tiah mờ tàm dunia. Củ tịc lơgar ồng Lương Cường đơs sùm gĭt gơ̆p 2 gah tàm tơngai do bơtàu tơngguh niam bơnĕ mờ Việt Nam kơ̆p kờñ ai gĭt gơ̆p 2 lơgar gơguh tus gơnoar broă pa.

Nàng ai lơh broă bal sền gàr dà lơgar đah Việt Nam mờ Thổ Nhĩ Kỳ gơlòt mŭt ngan ngồn tàm broă lơh, geh cồng nha rlau, Củ tịc lơgar sồr tơngai tus, Ƀộ Ling klàng bàr lơgar pơn jăt tai dong kờl, lơh jrô ơnàng rlau tai gĭt gơ̆p lơh broă bal tàm tơngume Jơnau cribơyai ring bal bè lơh broă bal sền gàr dà lơgar neh geh kĭ hơ, kung bè ală tơngume neh geh tàm cribơyai, ring bal tàm pơrjum bơyai đah bàr Ƀộ trưởng Ƀộ Ling klàng dê.