Tàm dơ̆ wă, Củ tịc lơgar ồng Lương Cường đơs nền, Việt Nam sùm sền dờng màng mờ kơp kờñ sơlơ tơnguh tai lơh broă bal mờ Hungary, lơgar lơh broă bal lài ngan khà dùl, mờ kung là lơgar lơh broă bal tơl làm lài ngan bơh Việt Nam dê tàm tiah đah tàm gùl mat tơngai lik câu Âu.

Đơs niam cồng nha dơ̆ pơrjum bơyai đah Củ tịc Quôk hội Việt Nam ồng Trần Thanh Mẫn mờ Củ tịc Quôk hội Hungary, Củ tịc lơgar ồng Lương Cường kơp kờñ Quôk hội 2 lơgar pơn jat tai pơgồp bal nàng lơh gơlik bơnàng jă adat boh lam, lơh gơlik bơta ƀuơn ai ală broă lơh ngan chồl tơnguh bơta git gơp lơh broă bal đah 2 lơgar, drơng bơta kuơ bal bơh 2 lơgar dê, tă pơgồp tàm ring lơngai, kơ̆ kơljap jŏ jòng sùm, lơh broă bal mờ bơtàu tơnguh tàm tiah do mờ tàm dunia. Bè lơh broă bal 2 lơgar, 2 nă kwang đơng lam bồ đơs nền, Việt Nam mờ Hungary rơp pơn jat tai pơgồp bal jơh nùs tàm tàm dong kờl gơp tàm ală anih cribơyai uă lơgar, ngan là tàm Liên hợp quôk, mpồl ASEAN, EU, mờ kung đơs ngan, kờñ gùng dà bơsong ală tam pìt tam phà mờ broă lơh ring lơngai, bơh bơta ki ngàm adat boh lam ală lơgar nàng gàr kơ̆ bơta kơnhăp jŏ, lơngăp lơngai tàm tơl tiah dê.