Tàm dar pơrjum, Mpồl duh broă Tĕ khà Dà lơgar cribơyai, tă pơgồp jơnau đơs bè: Jơnau rcang cih jơnau yal bơh Mpồl duh broă Tĕ khà Dà lơgar dê bè broă lam lơh broă lơh rcang lài ai dơ̆ tĕ khà ala mat Quôk hội khoă 16 mờ cau ala  mat Mpồl duh broă Làng bol ală kấp tơngai lơh broă bơh nam 2026 - 2031 bơh tơnơ̆ dar pơrjum dơ̆ 1 tus tŭ do mờ bàr pe kơnòl broă tờm tàm tơngai tus; kờp dŭ broă lơh, tơngume mờ broă rơndăp lơh rcang lài bơyai lơh pơrjum gùt lơgar bè lam lơh broă lơh tĕ khà cau ala mat Quôk hội khoă 16 mờ cau ala mat Mpồl duh broă Làng bol ală kấp tơngai lơh broă bơh nam 2026 - 2031; Jơnau lơh nền tàm pơrjum bè lơh tơrlòng lài sră nggal tơlik mat tĕ khà, sră tĕ khà mờ ală bơta sră nggal ngui tàm broă lơh tĕ khà cau ala mat Quôk hội khoă 16 mờ cau ala mat Mpồl duh broă Làng bol ală kấp tơngai lơh broă bơh nam 2026 - 2031.

Đơs pơndŭt dar pơrjum, Củ tịc Quôk hội ồng Trần Thanh Mẫn sồr tơl broă lơh tă pơgồp bal jơnau đơs kờñ tơrgùm rlau tai nàng gàr niam bơta jak chài, ngăc ngar, rcang lài, bơceh lơh, bơh gờñ, bơh ngài. Bè jơnau rcang cih broă rơndăp lơh Bơyai lơh Pơrjum gùt lơgar, Củ tịc Quôk hội sồr kờñ pal tam gơl pa Pơrjum lam lơh 2 gah, geh jàu phan, tam gơl wơl, ngan là tàm bơta mpồl lơh broă pa, kờñ pal geh bơta nền nòn, ngan ngồn, jơnau tă pơgồp bal, hơ lùp pal ngăc ngan, di, gơ kờn, tờm ngan, ngan ngồn.