Drim òr (11/08), tàm Hìu Quốk hội, Anih duh broă Lơh kơnòl broă sùm Quốk hội sơn đờm dar Pơrjum dơ̆ 48. Kờp dŭ tàm 3 ngai lơh broă, dar pơrjum rơ̆p sền wơl, ai jơnau đơs gơwèt mờ 17 tơngu me mờ ờ uă jơnau rơcang lài. Bơnah uă tơngu me do rơ̆p geh yal Quốk hội tàm Dơ̆ Pơrjum dơ̆ 10, dơ̆ pơrjum lồi dŭt tơngai lơh broă, tơn jơh 5 nam mờ ai geh bơnàng jă ai broă lơh bơh tơngai lơh broă khoă 16 in.

Kờp dŭ, Cíñ phủ rơ̆p yal rơlao 90 tơngu me tàm Dơ̆ pơrjum dơ̆ 10. Đơs sơn đờm dar pơrjum, Củ tịc Quốk hội ồng Trần Thanh Mẫn đơs tờm, dar pơrjum do geh kwơ màng ngan nàng kờñ ai jơnau đơs mờ sền wơl geh ring bal tàm Dơ̆ pơrjum dơ̆ 10 là Dơ̆ pơrjum dŭt ndơl bơh Khoă 15 dê. Tàm dơ̆ pơrjum dơ̆ 10 rơ̆p geh tơn jơh tơngai lơh broă Quốk hội, tơn jơh tơngai lơh broă bơh nam 2021 tus 2026, sền wơl ală broă lơh rơcang ai tơnkah ngai Bơyai lơh tĕ khà Quốk hội ngai 06 nhai 01 nam 2026. Bơdìh hơ̆ tai, Anih duh broă Lơh kơnòl broă sùm Quốk hội kung cri bơyai mờ pơgồp jơnau đơs: gùng dà broă lơh krơi is bơcri priă lơh ƀlàng rơndeh par Gia Bình; lơh nền khà mpồl lơh broă Kờp sền priă jền tă ngui dà lơgar kơnhoàl ù tiah gơwèt Kờp sền priă jền tă ngui  Dà lơgar … sền wơl Jơnau yal broă lơh làng bol kơ̆p kờñ Quốk hội dê nhai 07 nam 2025.