Broă Củ tịc Quôk hội ồng Trần Thanh Mẫn lòt Pơrjum dờng AIPA dơ̆ 46 đơs nền gùng dà lơh broă mờ lơgar ndai lơh tờm is, ring lơngai, lơh broă bal mờ bơtàu tơnguh, li la broă lơh, li la lơgar lơh broă bal bơh Việt Nam dê; pơn jat tai ai ală bơta git gơp bơtàu tơnguh tàm jơh ală bơta. 

Tàm dơ̆ lòt còp do, Củ tịc Quôk hội ồng Trần Thanh Mẫn geh ală dơ̆ pơrjum bơyai, tìp mat kuơmàng mờ Củ tịc Thượng viện Malaysia, Củ tịc Hạ viện Malaysia mờ ală kwang đơng lam kâp dờng ndai bơh lơgar Malaysia dê. Do là tŭ niam nàng 2 gah pơn jat tai lơh kơ̆ kơljap rlau tai bơta pin dờn jŏ jòng, rề ơnàng lơh broă bal nghị viện đah 2 lơgar. Tơnơ̆ tŭ tus lơgar Malaysia, Củ tịc Quôk hội ồng Trần Thanh Mẫn mờ Pơ ùr bal mờ Mpồl kwang bàng kâp dờng lơgar he neh còp mờ tìp mat kwang bàng, cau lơh broă Anih lơh broă ala mat lơgar Việt Nam tàm Malaysia, ala mat mpồl bơtiàn cau Việt Nam tàm lơgar Malaysia.