Tàm dơ̆ tìp Củ tịc Quôk hội lơgar Campuchia, mò Khuon Sudary, 2 nă kwang đơng lam bồ ring bal tàm tơngai tus 2 gah pơn jat tai lơh kơ̆ kơl jăp rlau tai bơta pin dờn cíñ trị, sùm cribơyai, lòt, tìp mat ală kấp tàm jơh ală gah; gàr niam tìp mat đah Nghị viện 2 lơgar nàng cribơyai mờng chài rơ̆ ru tàm gah lơh adat boh lam, jat sền mờ lơh nền ală broă kwơ màng bơh Dà lơgar dê.

Tàm dơ̆ tìp Củ tịc Quôk hội lơgar Timor Leste, mò Maria Fernanda Lay,  Củ tịc Quôk hội ồng Trần Thanh Mẫn sồr, 2 gah bơyai lơh pơrjum sơn rờp bơh broă lơh Anih duh broă Tàm bơrlŭ bal bè lơh broă bal lơh sa- măi mok Việt Nam - Timor-Leste nàng cribơyai bè ală broă lơh geh ngan ngui geh cồng nha bơta ƀuơn bơta pràn lơh broă bal tàm ală bơta Jơnau kĭ hơ neh kĭ; lam lơh geh cồng nha ală Jơnau ring bal neh kĭ hơ kung bè gờñ lơh sir, pơn đơl pràn lơh ngan kĭ hơ ală sră nggal đah 2 gah tàm gah bơto bơtê mờ bơsram, kă bro phe, anih cribơyai broă mờ lơgar ndai, jak chài- măi mok, lòt nhơl, năng lượng sàng goh.