Dơ̆ tơngkah 80 nam Kac màng nhai 8 lơh geh cồng nha mờ Sơntờm dà lơgar 02/9, geh ală broă lơh tờm: Rò sơm pòl ồs ờs mờng, bơhiàn cào kơ, Jơnau đơs bơh đơng lam Đảng, Dà lơgar dê; Cuh phău bơyai lơh tơngkah, ling rơndeh par par gờm chờ; Ai ling lòt pơdar, làng bol lòt pơdar. Ală mpồl ling lòt pơdar, làng bol lòt pơdar lòt jơng bal mờ mờr 16 rbô nă kwang bàng, cau ling, kwang àng bal mờ ala mat ală rơnàng làng bol, ală jơi bơtiàn…. Mpồl rơndeh ling klàng lòt pơdar geh tơl ală mpồl ling dà lềng, rơcang gàr kơl wàng trồ ling rơndeh par, ling cuh phău, rơndeh sơtăng, sơ zăp… mờ uă rơndeh mờng ngui ndai. Ling klàng 4 lơgar là Nga, Lo, Lào mờ Campuchia kung ai mpồl ling tus bal dơ̆ ai ling lòt pơdar sơl. Tơnơ̆ tŭ lòt gan anih bơyai lơh ai ling lòt pơdar, ală mpồl ling lòt pơdar rơp lòt gan bàr pe gơl gùng nàng ai tơnggŏ nùs nhơm đềt mềr đah ală gah mờ làng bol.

Tàm kơl wàng trồ Hà Nội, Mpồl ling rơcang gàr kơl wàng trồ - ling rơndeh par bơyai lơh 9 mpồl par bal mờ rlau 30 nơm rơndeh par geh rơndeh par duk, rơndeh par jun pơndiang phan, rơndeh par pơlam tàp tam lơh, rơndeh par phản lựk mờ rơndeh par tiêm kíc, lam lơh gơs uă mpồl par tàm Dơ̆ tơngkah. Kung tàm tŭ jơ do, tàm tiah dà lềng Cam Ranh, càr Khánh Hòa, ală mpồl ling dà lềng kung lam lơh ai ling lòt pơdar tàm dà lềng mờ sơñio rùp tơn rê bờ Ƀlàng dờng Ba Đình.

Tàm dơ̆ do, dồ ròt ală broă lơh niam chài, đơs crih tamya gam geh lơh tàm làm gùt lơgar. Tàm Hà Nội, ràng tơlik “80 nam gùng lòt Lơngăp lơngai is – Khat gơboh – Gơboh gơbài” neh pờ mpồng ờ sa priă drơng làng bol in bơh ngai 28/8 tus ngai 05/9/2025, tàm Anih tờm ràng tơlik dà lơgar, Cổ Loa, Đông Anh, Hà Nội. Ràng tơlik geh bơta tus bal bơh jơh 34 càr, ƀòn dờng, 28 ƀộ, gah lơh broă dà lơgar mờ ală mpồl lơh sa kă bro geh pơn rơ jak gùt lơgar. Ràng tơlik yal tơnggit, yal ală cồng nha geh pơn rơ bơh dà lơgar dê tàm 80 nam bơt bơtàu mờ bơtàu tơnguh tàm jơh ală broă. Mờ kung yal tơnggit niam chài Việt Nam mờ bơhiàn niam chài git nđờ rbô nam kah yau, bơta li la niam chài bơh 54 jơi bơtiàn dê, bơta li la bơh phan kuơ geh is, phan bơkah tiơng pơn rơ 3 tiah dà lơgar dê mờ ală broă lơh hìu đam geh pơn rơ ngan bơh rài yau mờ tŭ do tàm gùt lơgar.

Anih lơh broă jơnau đơs Việt Nam tus bal ràng tơlik mờ ù tiah ràng tơlik “80 nam Jơnau đơs Việt Nam lòt bal mờ dà lơgar”. Kuơmàng, tàm do làng bol gơtùi lòt sền măi mok ngan mờ ờ ngan “Rê wơl tŭ jơ king crŭ”: Ơm ntàu tàm ƀlàng dờng Ba Đình 80 nam lài, iat Củ tịc Hồ Chí Minh ntàu hơđang anih bơyai lơh sền Sră cih jơnau yal bơr lơngăp lơngai is, tàm nùs nhơm king crŭ, ki ngàm, ngoh rơngac tus hăt nhơm, gơ bơrlŭ bal tàm sap tàp tê, sap driau dờng bơh git nđờ jơt rbô nă làng bol dê, bal mờ gơp yơr tê sơn tơm să sền gàr dà lơgar. Mìng tàm 2, 3 ngai “Rê wơl hờ tŭ jơ king crŭ” neh wă rò git nđờ jơt rbô nă cau lòt sền mờ jòi git.

Càr lơgar Hà Nội bơyai lơh broă lơh đơs crih tamya tơngkah 80 nam Kac màng nhai 8 lơh geh cồng nha mờ Sơntờm dà lơgar 02/9 tàm 2 anih: Hìu niam chài Quần Ngựa mờ Ƀlàng dờng kac màng Nhai 8 (tềng đap Hìu đơs crih Dờng). Ƀòn dờng bơyai lơh 6 anih cuh phău bơkàu nàng drơng làng bol in.

Dùl tŭ bal, ƀòn dờng Hồ Chí Minh kung rơp àng gơ crà mờ 4 anih cuh phău bơkàu. Bơta tờm tàm ròt ală broă lơh tàm ƀòn dờng do là broă lơh đơs crih tamya is ồn bơyai lơh tàm 3 anih là gùng Nguyễn Huệ (quận 1), anih bơyai lơh bơdìh Kông viên tiah tờm ƀòn dờng pa (sơnah ƀòn Bình Dương) mờ Ƀlàng dờng Thùy Vân (sơnah ƀòn Vũng Tàu).

Tàm tiah Tây Nguyên – Đah jum tàm gùl lơgar, ròt ală broă lơh niam chài, đơs crih tamya, tàp pràn să jan, cuh phău bơkàu… kung geh bơyai lơh tàm làm gùt ală tiah nàng drơng làng bol in. Pơn rơ ngan là dơ̆ lơh chờ “Tơrgùm bơta niam chài ù tiah brê bơnơm – dà lềng tơlir bơtòm bal” tàm càr Gia Lai; Poh Niam chài – Lòt nhơl – Phan sa mờ broă lơh đơs crih tamya tàm càr Dăk Lăk; Ròt ală dơ̆ ràng tơlik “Lâm Đồng – 50 nam bơta chờ hờp tơrgùm dùl”, ràng tơlik bơkàu niam chài tàm Dà Làc, Lâm Đồng; Ròt ală dơ̆ ràng tơlik 50 nam tơngklàs Gia Lai – Kon Tum tàm Ƀlàng dờng Tam klac dờng, Pleiku, càr Gia Lai; ròt ală dơ̆ ràng tơlik “Bơta niam bơtòm tơrgùm bal” mờ Drà ràng tơlik mìng gah lơh kơphe mờ phan OCOP tàm Buôn Ma Thuột, càr Dăk Lăk…