Bơta mìu dà tih dà lìu tàm tiah đah mat tơngai lik càr Dăk Lăk gam gơlik geh kơn jơ̆ ngan tŭ mìu dờng jŏ jòng tàm uă tiah, tàm tŭ ală hìu măi pờ tơlik ồs đèng dà dồ ròt tam pà dà uă ngan rê hờ tiah đah đơm. Lòt sền broă rơcang lài drơng wơl tàm ală sàh tiah đah tô mho ngai 19/11, Phó Thủ tướng ồng Hồ Quốc Dũng sồr ală mpồl mhar ntrờn làng bol lài mờ tŭ trồ mang, ơn kơnòl dong làng bol lài ngan. Dà tih dà lìu tàm dà dờng Ba mờ ală dà dờng tiah đah tô Dăk Lăk neh sơrlèt rlau bơta dà tih dà lìu dờng ngan bơh nam 1993 dê. Gùng dà lơgar 1A mờ uă gơl gùng dà lơgar ndai gơtìp dà wềl, tam cah is, lơh gơbàn kal ke uă ngan tus broă dong kờl rềs àr. Mìu dờng pơn jat tai jŏ jòng lơh dà tih dà lìu gơguh mhar tàm ală sàh jat kềng gah dà dờng Tam Giang, dà dờng Cái, dà dờng Ba mờ dà dờng Bàn Thạch, pơhìn tus bơta lơngăp lơngai ờdo ờdă bơh git nđờ rbô hìu bơnhă làng bol. Ală mpồl lơh broă geh gơnoar geh sồr lam lơh broă rơndap lơh sền gàr niam ờdo ờdă màng kis mờ phan bơna làng bol in.

Mang ngai 19/11, Khánh Hoà pơn jat tai geh mìu dờng. Uă tiah ngơr jrô, tam cah is; khà dà tàm ală dà dờng gơguh tih pal yal tơngĭt lài, pơhìn tơrlah ù dờng ngan. Tềng đăp bơta kal ke, Duh broă sùm Tỉñ ủy càr Khánh Hoà ai tơlik jơnau yal mhar, sồr ală mpồl tơrgùm uă ngan rlau jơh drơng, gàr niam lơngăp lơngai ai làng bol in. Jat jơnau yal, drim gờñ ngai 20/11, mìu dờng pơn jat tai gơlik geh, khà dà tih gơguh uă ngan lơh ngơr dà tàm uă tiah. Tàm 48 jiơ tus, jơh gùt càr digơlan geh tai mìu dờng tus dờng ngan; dà tih dà lìu tàm ală dà dờng bè dà dờng Cái Nha Trang, dà dờng Cái Phan Rang, dà dờng Dinh (Ninh Hòa)… pơn jat tai gơguh tih mhar. Duh broă sùm Tỉñ ủy càr sồr Mpồl đơng lam rcang gàr lài làng bol càr mờ mpồl ling phàu crong hòi jà uă ngan rlau jơh rơndeh rơndồ măi mok mhar trờn làng bol lik bơh tiah sơbơng roh.

Mang ngai 19/11, càr Gia Lai kong gơ rềng kơn jơ̆ kơn jut ngan bơh dơ̆ dà tih dà lìu dờng ngan tŭ mìng tàm dùl ngai mang neh geh 3 nă cau chơt; rlau 10 rbô 400 hìu bơnhă gơtìp ngơr bam halà gơtìp gơ wềl. Tềng đap bơta jal mhar, Củ tịc Anih duh broă Làng bol càr Gia Lai ồng Phạm Anh Tuấn sồr kwang àng, ling klàng mờ gơnoar atbồ tàm ƀòn lơgar ntrờn làng bol mờ tơl broă lơh. Mpồl kwang àng neh ntrờn rlau 3 rbô dơ̆ cau, dong kờl 184 nă cau lik bơh tiah ngơr bam jrô. Tàm ală sàh bè Ia Tul, Ia Pa, Pờ Tó, Ia Rsai, Uar… mpồl dong kờl rềs àr pal ngui ka nô, che dong kờl, geh tŭ tiă dà nàng mut tàm tơl hìu bơnhă gơtìp dà wềl. Jat kềng gah dà dờng Ba, git nđờ rhiang hìu bơnhă làng bol tàm ală ƀòn neh geh ntrờn tus tiah niam ờdo ờdă.

Kung tàm mang ngai 19/11, tàm kuèl Mimosa, gơ wèt ù tiah sơnah ƀòn Xuân Hương – Dà Làc, càr Lâm Đồng gơlik geh bơta nchùn ù dờng ngan. Jơh bơnàng gùng gơtìp koh gơl tơn. Tàm bơta jal mhar, mpồl dong kờl rềs àr kwang àng càr Lâm Đồng neh gùt mang sơrlèt gan ù tiah kơh bơnơm, tàm pơrlòng mờ tŭ jơ nàng dong kờl rềs àr mờ ntrờn niam ờdo ờdă 12 nă làng bol lik bơh tiah sơbơng roh.