Hìu bơsram mầm non Hoạ Mi, sàh Buôn Đôn, càr Dăk Lăk pa geh bơcri priă lơh tai dùl sèng hìu mờ 3 cơldŭ bơsram mờ hìu lơh broă, kờp jơh priă tă lơh 6 tơmàn đong. Do là broă lơh ngan bơh sàh dê nàng kờñ tơnguh khà ơdŭ bơsram tus 11 ơdŭ tàm hìu bơsram tờm mờ 1 ơdŭ bơsram tàm hìu bơsram sơnĕ tàm ƀòn Drăng Phôk, drơh jơnau kờñ bơsram sră bơh 360 nă kơnòm dềt dê tàm gùt sàh. Pơgru H’Nên Ksor, pơgru Hìu bơsram mầm non Họa Mi pà git: “Do là nam bơsram sơn rờp tàm hìu bơsram pa, cơldŭ bơsram pa, phan bơna ndrờm pa jơh lơm, lơh gơlik bơta niam ngan nàng kơnòm bơsram in lòt bơsram uă rlau. Hìu bơsram pa, ơdŭ pa, pơgru chờ hờp ngan, hô hơng ngan tŭ phan bơna wil tơl, mè bèp mờ kơnòm bơsram kung chờ hờp ngan, ngai chờ tus hìu bơsram mè bèp lam kòn lòt bơsram wil tơl ngan”.

Ờ mìng kâp mầm non, ală hìu bơsram kâp 1 mờ kâp 2 tàm sàh Buôn Đôn kung geh sền gròi bơcri priă blơi phan bơna sơl. Tŭ ală cơldŭ bơsram dờng niam geh lơh gơs, pơgru tus tơl hìu nàng hòi jà kơnòm bơsram lòt bơsram. Tàm sàh tiah nhàr lơgar do, kơnòm bơsram jơi bơtiàn dồ êt nă cau geh tus 86%, broă hòi jà ală oh lòt bơsram wil tơl ờ di là broă ƀuơn. Ồng Hồ Sĩ Lâm – Kwang lam bồ Hìu bơsram kâp 1 Y Jút pà git: “Bồ nam do, Anih duh broă Làng bol sàh sồr lơh nền nòn ngan broă lơh hòi jà kơnòm bơsram. Mpồl đơng lam hìu bơsram mờ pơgru neh tus tơl hìu bơnhă nàng lơh sră rơ wah kơnòm bơsram tàm hìu tơn. Kơnờm bơh hơ̆, tus tŭ do, jơh 125 nă kơnòm bơsram tàm sơnam lòt bơsram neh lòt bơsram wil tơl. Ală kơnòm bơsram ơdŭ 1 kung neh geh tơrgùm tus ơdŭ bơsram nàng lơh kwèng mờ ơdŭ pa”.

Dilah bè tàm kâp 1, broă hòi jà kơnòm bơsram ƀuơn rlau den tàm kâp 2, broă lơh do gơtìp uă bơta lòng rlau. Tài uă oh neh dờng, hìu bơnhă rƀah lơ ời, kal ke den tàng digơlan ală oh pal sang bơsram nàng dong mè bèp uă rlau. Tềng đap bơta geh ngan do, ờ mìng gơnoar atbồ mờ hìu bơsram, mờ uă mpồl bal, cau nă să is geh nùs nhơm niam kung neh lòt bal nàng hòi jà ală oh pơn jat tai lòt bơsram. Mò Võ Thị Loan – Phó kwang lam bồ Hìu bơsram kâp 2 Võ Thị Sáu yal: “Nam bơsram do, hìu bơsram geh 425 nă kơnòm bơsram, rlau 80% là oh kòn làng bol jơi bơtiàn dồ êt nă cau. Nàng ală oh iang nùs lòt bơsram, bơdìh mờ bơta lơh bal bơh gơnoar atbồ mờ gah bơto bơsram dê, bol hi gam dờp geh bơta at tê bal bơh ală cau geh nùs nhơm niam dê tai. Di bồ nam bơsram, Kwang àng ƀòn dờng Hồ Chí Minh pơgồp bal mờ Kwang àng càr Dăk Lăk pà 16 ƀộ sră măi, 10 nơm rơndeh coh ai kơnòm bơsram kal ke in, bal mờ 5 nơm măi tíñ ai cơldŭ bơsram tin họk in. Dùl mpồl lơh sa kă bro tac phan hờ lơgar ndai tàm sàh kung dong kờl tai 10 nơm rơndeh coh ai kơnòm bơsram tiah ngài in”.

Nàng lơh geh cồng nha hơ̆, gam geh bơta lòt bal bơh să tờm mpồl bơtiàn ƀòn lơgar dê tai. Kra ƀòn, cau atbồ ƀòn, ală mpồl bal, mpồl cau tàm sàh ndrờm at tê bal mờ hìu bơsram kờp sền, hòi jà, dong 100% kơnòm dềt lòt bơsram di sơnam. Mò H’Đa Nê Byă – atbồ ƀòn Buôn Đôn, sàh Buôn Đôn pà git: “Cau atbồ ƀòn bal mờ Mpồl đơng lam hìu bơsram, pơgru lòt hòi jà tơl hìu, sồr mè bèp lam kơnòm bơsram lòt mut nam bơsram pa di tŭ jơ. Kơnờm geh bơta pơgồp bal, bơta sền gròi di tŭ bơh jơh gùt ƀòn mờ mpồl đơng lam hìu bơsram dê, bơta hòi jà bơh pơgru dê den tàng kơnòm bơsram tàm do lòt bơsram wil tơl. Do là bơta sền gròi di tŭ ngan bơh ală kâp gơnoar atbồ, hìu bơsram dê tus mờ mè bèp kơnòm bơsram”.

Bơh bơta crăp rơcang  bơcri priă blơi phan bơna, mpồl cau pơgru tus bơta lơh ngan ờ kơnòm bơsram lơi tài rài kis kal ke mờ ờ gơtùi lòt bơsram, tus tŭ do, tơl broă lơh rơcang ai nam bơsram pa in tàm sàh tiah nhàr lơgar Buôn Đôn neh lơh gơs, rơcang mut tàm nam bơsram pa. Ồng Lê Thanh Sơn, Phó Củ tịc Anih duh broă Làng bol sàh Buôn Đôn, càr Dăk Lăk đơs nền: “Tàm tơngai tus, sàh rơp pơn jat tai bơcri priă blơi phan bơna, lơh niam ù tiah gùt dar hìu bơsram, mờ kung tơngkah cồng nha bơto bơsram, gàr jơnau kờñ niam ngan rlau jơh ai nam bơsram pa in”.

Mờ bơta sền gròi bơcri priă bơh dà lơgar dê, bơta lơh bal kràñ cê bơh gơnoar atbồ, bơta jơh nùs bơh pơgru dê, bơta dùl nùs bal bơh mè bèp mờ bơta tam pà bal bơh ală cau geh nùs nhơm niam dê, nam bơsram pa tàm sàh tiah nhàr lơgar Buôn Đôn, càr Dăk Lăk rơp sơn đờm mờ ală bơta chờ hờp wil tơl. Do kung là bơnàng jă ai broă lơh bơto cau tàm ù tiah gam uă kal ke do.