Uă srơh tàm pơrlòng neh gơs là bơta niam, gơ rề pràn ngan tàm rài kis mpồl bơtiàn, bè: Srơh “Gùt lơgar at tê bal bơt bơtàu ƀòn lơgar pa” mờ 26 sàh lơh geh jơnau sồr, 4 sàh lơh geh ƀòn lơgar pa gơguh jơnhua, rlau 760 phan OCOP, tàm hơ̆ geh 2 phan 5 sơmañ. Srơh “Tài cau rƀah - Ờ lời cau lơi gơtìp lời wơl hờ ngkời” pơgồp bơnah ai khà hìu bơnhă rƀah tiah làng bol jơi bơtiàn dồ êt nă cau gơmù gam 9,7%.

Srơh “Kwang bàng, cau lơh broă sa priă nhai dà lơgar tàm pơrlòng lơh jat niam chài tàm anih lơh broă” mờ “Làng bol bơsram sră sồ” neh lơh geh pràn ngan tam gơl sồ tàm jơh gùt mpồl lơh broă sră pơ àr gơnoar atbồ, 100% sră pơ àr gơnoar atbồ geh bơsong tàm điện tử. Ồng Tạ Anh Tuấn - Củ tịc Anih duh broă Làng bol càr Dăk Lăk, Củ tịc Mpồl duh broă Tàm pơrlòng Pà phan ƀàn càr đơs nền, do là Pơrjum dờng Tàm pơrlòng kờñ gơboh dà lơgar sơn rờp bơh càr dê tơnơ̆ tŭ tơmut bal, geh gơtha cíñ trị niam ngan, lơh tềl bơta sơn đờm ai tŭ tơngai bơtàu tơnguh pa in, ờ mìng tàm pơrlòng tàm tơl broă mờ gam tàm pơrlòng tam gơl pa bồ tơngoh kơlôi sơnơng atbồ mờ lơh gơlik bơta kơp kờñ brồ guh bơh làng bol dê.