Bơh ngai 29/09 tus 01/10, tàm sơnah ƀòn Buôn Ma Thuột, Đảng ƀộ càr Dăk Lăk bơyai lơh Pơrjum dờng Cau ala măt dơ̆ sơnrờp, tơngai lơh broă bơh nam 2025- 2030.

Tus bal Pơrjum dờng geh 449 nă cau ala măt, ala măt ai rlau 137 rbô nă đảng viên tàm jơh gùt Đảng ƀộ càr Dăk Lăk. Pơrjum dờng tơngai lơh broă do, Dăk Lăk cih Jơnau lơh nền tàm pơrjum mờ jơnau đơs “Tam klăc – Làng bol lơh tờm – Duh rơngòt adăt boh lam – Tam gơl pràn – Bơtàu tơngguh”, ơn broă jàu bơta pràn gơguh lơh sa kờp bal 10,5% tàm dùl nam, priă lơh geh kờp bal dùl nă cau geh 153 tơlak đong tàm nam 2030, khà hìu rƀah tàm tiah jơi bơtiàn dồ êt nă cau gơmù pơgăp 3% tàm dùl nam; broă lơh bơ̆t bơtàu Đảng tơmŭt bơh 3 tus 4% đảng viên tàm dùl nam, pah nam geh rlau 90% mpồl Đảng kâp hơđơm, đảng viên geh sền swì, rơndăp khà bơh lơh sir niam kơnòl broă rlau hơđang…Bơdìh mờ broă sền wơl jơh ală tơngai lơh broă pa do bơh nam 2020- 2025, ai geh broă rơndăp lơh, kơnòl broă, gùng dà broă lơh mờ ai lơh jăt jơnau lơh nền tàm pơrjum ai tơngai lơh broă bơh nam 2025- 2030 in, Pơrjum dờng yal ală Jơnau lơh nền Ƀộ Cíñ trị dê bè kwang bàng sồr mŭt tàm Mpồl Duh broă Đảng ƀộ càr mờ Mpồl Lơh kơnòl broă sùm Tỉñ ủy càr tơngai lơh broă bơh nam 2025- 2030.

Tàm dar rơcăng bơh Pơrjum dờng Đảng ƀộ càr Dăk Lăk dê geh lơh tàm mho ngai 29/09, Pơrjum dờng dùl nùs ring bal pồ Mpồl Củ tịc geh 12 nă oh mi mờ 3 nă oh mi mŭt tàm Jơnum cau gơnoar cih.