Jơh gùt càr tŭ do geh rlau 3 rơbô nơm ơhò mờ rlau 12 rơbô 500 nă cau lơh broă. Tàm hơ̆, pơgăp 500 nơm ơhò mờ 2 rơbô 800 nă cau lơh broă gam lơh broă tàm dà lềng; khà gam wơl tus tiah ơm lơngăp lơngai. Tam pà jat tiah, geh 424 ơhò lơh broă tàm tiah dà lềng Quảng Ngãi – ƀòn dờng Hồ Chí Minh; 24 nơm ơhò ơm tàm tiah dà lềng Đồng Tháp – An Giang; 70 nơm ơhò ơm tàm tiah bồt dờng Trường Sa. Jơh ală ơhò do neh geh jun rê tàm tiah ơm lơngăp lơngai; gĭt nđờ rơhiang hìu gŭ ròng phan tàm dà geh lơh kơ̆ kơnhăp.

Ală jơnau tàm yal tơngĭt gàr niam sùm, gàr niam di tŭ yal mờ kấp hơđang in mờ pơgồp bal niam mờ gơnoar atbồ, mpồl lơh broă geh gơnoar tàm broă bơsong ală bơta digơlan gơlik geh.

Ngai 25/08, cau ling sền gàr tiah nhàr lơgar càr Gia Lai neh hòi jà 3 rơbô 397 nơm ơhò mờ rơlao 23 rơbô 100 nă cau lơh ka rê tàm ù gơl nàng pleh mờ Mìu càl dờng sồ 5. Nàng rơcang pleh mờ mìu càl dờng sồ 5, Mpồl đơng lam cau ling sền gàr tiah nhàr lơgar càr Gia Lai neh tơlik 3 jơnau sồ jal mhar, sồr ală mpồl lơh broă tơnguh jơnau sền gròi, sền gròi trồ tiah tàm tiah nhàr lơgar mờ tiah dà lềng; mờ yal, bơto sồr ală ơhò, plung git tiah, wèt ntrờn bơh mìu càl dờng dê nàng rơcang pleh, lik klàs ha là bañ mŭt tàm tiah ngòt rơngơ̆t.

Mpồl ling sền gàr tiah nhàr lơgar neh bơto sồr 626 nơm ơhò mờ 5 rơbô 147 nă cau lơh ka tus ơm pleh tàm ală anih lơngăp lơngai; mờ hòi jà geh 3 rơbô 397 nơm ơhò mờ 23 rơbô 104 nă cau lơh ka tus jăt gah dà lềng nàng pleh niam.