Tàm tiah nhàr lơgar càr Dăk Lăk, Phó Thủ tướng ồng Mai Văn Chính neh geh jơnau sồr sơn đờm lơh Hìu bơsram kòn cau ơm sa bic tơn kâp 1 mờ kâp 2 sàh Ia Rvê. Rơndap broă lơh geh lơh tàm bă ù ơnàng rlau 5 lồ, mờ kờp jơh priă bơcri lơh rlau 185 tơmàn đong. Sàh Ia Rvê là sàh rềp mờ lơgar Campuchia, rài kis làng bol dê gam uă kal ke. Gùng lòt tus hìu bơsram bơh kơnòm bơsram tiah nhàr lơgar dê gam ngài, phan bơna gam siơ̆u siar. Bè hơ̆ den tàng, ală oh là ală cau chờ hờp ngan rlau jơh tŭ hìu bơsram ơm sa ngai bàr kâp geh sơn đờm lơh. Oh Lang Thị Yến Vy, kơnòm bơsram ơdŭ 7. Hìu bơsram kâp 2 Nguyễn Thị Định đơs: “Tŭ git hìu bơsram he dê geh lơh pa, oh chờ hờp ngan, kơp gơn mhar geh hìu bơsram pa nàng bơsram niam rlau”.

Ai ồng Vi Xuân Thủy tàm sàh Ia Rvê pà git, làng bol chờ hờp ngan mờ iang nùs ngan tàm broă bơsram sră oh kòn dê tŭ geh hìu bơsram bàr kâp, ơm sa ngai dờng niam: “Jơh ală mè bèp mờ làng bol tàm sàh ndrờm chờ hờp chờ hờn lơm. Bol hi ưn ngài dà lơgar neh sền gròi lơh hìu bơsram pa nàng ală sau geh anih bơsram niam rlau. Geh hìu bơsram dờng niam, mè bèp bè bol hi kung iang nùs rlau tŭ pơyua oh kòn he dê lòt hìu bơsram”.

Bal mờ hìu bơsram tàm sàh Ia Rvê, tàm dơ̆ do, càr Dăk Lăk gam sơn đờm lơh 2 hìu bơsram ơm sa bic tơn bàr kâp ndai là Hìu bơsram ală kâp ơm sa bic tơn sàh Ia Lôp geh priă bơcri lơh là 105 tơmàn đong, Hìu bơsram ală kâp sàh Buôn Đôn geh priă bơcri lơh rlau 158 tơmàn đong.

Tàm càr Gia Lai, Phó Thủ tướng Cíñ phủ ồng Hồ Quốc Dũng neh tus bal dơ̆ sơn đờm lơh Rơndap broă lơh Hìu bơsram ơm sa bic tơn kâp 1 mờ kâp 2 tàm 7 sàh tiah nhàr lơgar geh: Ia Mơ, Ia Púch, Ia Pnôn, Ia Nan, Ia Dom, Ia Chia mờ Ia O, mờ kờp jơh priă bơcri lơh rlau 1 rbô 500 tơmàn đong. Ală hìu bơsram rơp lơh gơlik bơnàng jă bơsram sră kơnhăp niam ai rlau 7 rbô nă kơnòm bơsram tàm tiah nhàr lơgar càr Gia Lai in, uă ngan là kơnòm bơsram jơi bơtiàn dồ êt nă cau. 

Đơs tàm dơ̆ sơn đờm lơh, Phó Thủ tướng ồng Hồ Quốc Dũng đơs sùm: rơndap broă lơh geh gơtha kuơ màng ngan gơ wèt mờ tiah nhàr lơgar, dong bơtàu tơnguh cau lơh broă, gàr kơ̆ mpồl tam klac dờng mờ gàr kơ̆ lơngap lơngai dà lơgar: “Bơdìh mờ broă dong kờl den gơnoar atbồ tàm ƀòn lơgar, cau pơgru, mè bèp kơnòm bơsram geh kơnòl pơn jờng oh kòn lòt bơsram wil tơl. Ală sau iang nùs bơsram sră tàm hìu bơsram pa, ờ lời ală sau sang tĕ bơsram. Hơ̆ kung là jơnau kờñ bơh Ƀộ Cíñ trị dê tàm Jơnau đơs pơn dut sồ 81, pơgồp bơnah bơto bơtê cau lơh broă tàm tiah nhàr lơgar. Ală sau tơnơ̆ do dờng, rê wơl bơt bơtàu ƀòn lơgar, sền gàr lơngăp lơngai tiah nhàr lơgar, gàr kơ̆ rơndap tap sèng lơngăp lơngai mpồl bơtiàn tàm ƀòn lơgar”.

Cih dờp jơnau đơs sồr lơh bơh Phó Thủ tướng dê, Phó Ƀí thư Tỉñ ủy càr, Củ tịc Anih duh broă Làng bol càr Gia Lai ồng Phạm Anh Tuấn hơ pơrgon lam lơh rơndap broă lơh mờ bơta pơnđơl pràn cíñ trị uă mờ lơh broă kràñ cê, geh cồng nha. Càr kung hơ pơrgon gàr tơl mpồl cau pơgru, tàm tơrbŏ bal phan bơna pal geh, lơh gơs rơndap broă di tơngai pơrgon: “Đơng lam ală mpồl, anih lơh broă geh gơ rềng git nền do là broă rơndap lơh is ồn, kờñ pal lam lơh mờ jơnau đơs: jal mhar, kơnhăp kơ̆, geh cồng nha; rơcang ală bơta bè cau pơgru, tàm tơrbŏ bal phan bơna pal geh bè gùng lòt, dà sàng, ồs đèng, viễn thông… mhar lơh sir gùng dà, broă lơh dong kờl krơi is gơ wèt mờ cau pơgru, kơnòm bơsram, nàng ală hìu bơsram geh tơl bơta gơtùi lơh broă tơn bơh bồ nam bơsram 2026 – 2027”.