Tàm pơrjum, ală cau ala măt neh geh iăt ală anih lơh broă broă mờng lơh pơlam nền cê ală tơngume tờm kwơmàng drơng broă lơh tĕ khà, geh: broă lơh kwang bàng (Mpồl Rơndăp broă Tỉñ ủy càr); bơyai lơh pơrjum cau tĕ khà, pơrjum cribơyai ring bal, yal tơnggĭt cau tơlik măt tĕ khà (Anih duh broă Mặt trận dà lơgar Việt Nam càr); cih, ătbồ mờ tơm tơn jơh priă tă tĕ khà (Sờh Priă jền); kơnòl broă bơyai lơh tĕ khà (Sờh Broă dơlam is); broă lơh pà ƀăng kị, sền gàr lơngăp lơngai, rơndăp tăp sèng (Kwang àng càr); mờ broă lơh mblàng yal tĕ khà (Sờh Niam chài, Tàp pràn să jan mờ Lòt nhơl).

Tàm pơrjum, ồng Lương Nguyễn Minh Triết, Ƀí thư Tỉñ ủy càr, Lam bồ Mpồl Sồr lơh broă lơh tĕ khà càr Dăk Lăk tơngkah, tŭ do jơh ală anih lơh broă cíñ trị tàm càr gam lơh jăt bal uă kơnòl broă kwơmàng, ngan là bơsong jơnau gơlời wơl tài bơh mìu dà tih dà lìu, ală kâp, ală gah pal yờ tơngguh uă nùs nhơm geh kơnòl, lơh broă sơrbăc mhar, jak chài “lơh broă tus bàr dơ̆, pe dơ̆” nàng gàr bè ờs rài kis, lơh sa làng bol dê, mơkung lam lơh niam broă lơh tĕ khà.