Dăk Lăk lơh kràñ atbồ hìu gŭ rơkị ròng phan tàm dà
Thứ sáu, 10:53, 14/11/2025
Cau mblàng K’Hạnh/VOV
Cau mblàng K’Hạnh/VOV
VOV.K’Ho- Tàm dơ̆ lơh broă mờ Sờh Broă lơh sa suơn sre mờ Tiah ơm kis, ồng Lương Nguyễn Minh Triết, Ƀí thư Tỉñ ủy càr Dăk Lăk sồr sơlơ tơnguh tai atbồ kràñ broă lơh ròng phan tàm dà hìu gŭ rơkị, ngan là tàm ală tơnau dà dờng mờ tiah jat kềng gah dà lềng, nàng kờñ gàr niam broă bơtàu tơnguh lơh sa lòt bal mờ sền gàr tiah ơm kis kơnhăp jŏ.
Jơh gùt càr Dăk Lăk tŭ do geh rlau 9 rơbô 500 lồ ròng phan tàm dà, khà lơh geh rlau 33 rơbô tấn pah nam. Uă tiah jat jềng gah dà lềng, dà dờng, tơnau dà dờng geh khà ròng ka gŭ rơkị uă ngan, lơh bơ̆ bơl uă tiah, gơrềng tus bơta sàng goh dà mờ bơta sàng goh tiah ơm kis brê bơnơm dê. Khà hìu gŭ rơkị ròng phan tàm dà geh sơlơ gơguh, mơya broă lơh rơndăp ù tiah, sŏk sền tiah ơm kis tiah ròng phan kung gam kal ke.
Tàm dơ̆ lơh broă, Ƀí thư Tỉñ ủy càr Dăk Lăk sồr ală tiah mhar kờp sền, rơndăp ù tiah wơl jơh ală tiah ròng phan tàm dà. Ồng đơs sùm, nàng gah ròng phan tàm dà in geh bơta kơnhăp jŏ, pal pơn jờng ngui măi mok ròng sàng goh, tàm pơdar dà, jòi gĭt tiah tờm lơh gơlik.
Viết bình luận