Ồng Nguyễn Hải Triều, Phó Kwang Lam bồ Sờh Lơh sa mờ măy mŏk mờ Kă bro phan càr Dăk Lăk dê pà gĭt, tŭ do gah neh pà jơh phan kờñ pal geh tus kâp hơđơm in, mơkung sồr ală mpồl lơh broă kă bro phan pơn jăt tai bơtơl khà phan pa nàng drơng jơnau kờñ tơnơ̆ dà lìu. Ồng Triều đơs:

“Sờh Lơh sa mờ măy mŏk mờ Kă bro phan kung neh geh sră nggal pơyua ală mpồl lơh broă kă bro phan in là pơn jăt tai blơi phan nàng drơng ai làng bol in blơi phan tơnơ̆ tŭ dơ̆ dà lìu mìu càl rbŭt dờng dơ̆ do. Mơkung sồr ală mpồl geh gơrềng bè ătbồ drà tăc blơi nàng gĭt broă ờ huan geh jơnau geh ngan prăp pồn phan tơngguh giă tơnơ̆ kàl mìu càl rbŭt dờng”.

Dùl tơngai bal, gah lơh sơnơm gam lam lơh ndrờm bal uă broă lơh nàng pleh pơhìn gơbàn uă kòp bơtờp. Sờh Lơh sơnơm càr Dăk Lăk neh tă pà 2 rbô 905 kơldung sơnơm hìu bơnhă, 1 rbô 750 kĭ chloramin B, 30 rbô gơnar aquatab ai ală ƀòn lơgar in. Ală mpồl lơh broă mhar geh lơh broă wơl, pơgồp bal dong kờl lơh bơsong tiah ơm kis tơn tàm ală anih ngơr bam jrô. Ồng Phạm Minh Hữu, Phó Kwang Lam bồ Sờh Lơh sơnơm càr pà gĭt jơh ală anih kham sơm kòp neh tus wơl lơh broă:

“Tŭ do, jơh ală Hìu sơnơm kâp càr mờ ală Anih tờm Lơh sơnơm neh lơh broă bè ờs. Gah lơh sơnơm gam pơn jăt tai pơgồp bal mờ ală Hìu sơnơm Dà lơgar nàng lam kham sơm kòp. Sờh Lơh sơnơm neh lùp mờ ală Anih tờm Lơh sơnơm mờ ală Hìu sơnơm sàh nàng yal ală anih hìu sơnơm sàh, sồr Anih duh broă Làng bol ală sàh, sơnah ƀòn geh ală mpồl tus den pơgồp bal mờ ală gah lơh sơnơm nàng lam hòi jà làng bol lòt kham kòp”.

Gah bơto bơtê cih dờp khà hoàc hươr dờng ngan, is ồn là tàm kâp mầm non tài bơh jơh ală phan ngui ơm sa ngai tàm hìu bơsram, ồi tơ̆ kơmùng, kƀàng, cơghế gơtìp ờdiơng jơh. Neh geh 1 rbô 195 tàm 1 rbô 379 hìu bơsram lòt bơsram wơl; gam 184 hìu bơsram ờ hềt gơtùi pờ mpồng, ndrờm bè jơh ală tàm kơnhoàl ù tiah đah măt tơngai Lik. Mò Lê Thị Thanh Xuân, Kwang Lam bồ Sờh Bơto bơtê mờ Bơsram càr Dăk Lăk pà gĭt, gan gam dan bơnah priă jền rlau 172 tơmàn đong nàng bơsong kal ke:

“Ală hìu bơsram ờ hềt bơto bơsram ngan digơlan kung pal tus jơh poh do, tài bè kâp mầm non tŭ do ìs rañ kơnền mờ ală phan ngui den mìu kung gam ờ hềt jơh sơl, cơldŭ bơsram den là sùh iò ngan, tiah ơm kis kung ờ hềt niam sơl nàng ală kòn in wơl tus wơl cơldŭ den tàng kung ờ hềt iang nùs sơl. Kung digơlan pal roh 1 poh tai hơ̆ sồng bơsong kal ke jơh”.

Bè đèng, Kông ty Ồs đèng càr Dăk Lăk neh hòi tơrgùm mpồl cau dong kờl bơh Quảng Bình, Quảng Trị, Huế, Đà Nẵng, Quảng Ngãi. Tŭ do gam 42 rbô 246 nă cau ngui đèng, ndrờm mờ rlau 13% tàm kơnhoàl ù tiah đah măt tơngai Lik gam chơ̆t đèng. Ồng Trần Văn Thuận, Kwang Lam bồ Kông ty Ồs đèng càr Dăk Lăk pà gĭt:

“Gơ wèt mờ ală anih hìu bơsram den jăt jơnau sồr lơh bơh gah đèng dê den ală anih hìu bơsram là ai lài tàm tơngai bơsong. Broă do gah đèng rơ̆p pơgồp bal mờ anih Sờh Bơto bơtê mờ Bơsram nàng bơsong jơh”.

Tàm gah broă lơh sa sươn sre, gah gam kờp sền nền wơl hoàc hươr nàng lam lơh dong kờl jăt Jơnau lơh nền sồ 09 Cíñ phủ dê, ala tài pà sơntìl tơn tài bơh trồ tiah mờ bơta gar sơntìl ờ geh niam. Tŭ do, 40 sàh, sơnah ƀòn gơ wèt khà dong kờl jal mhar gam geh 120 nă kwang bàng sồr tus kâp hơđơm nàng kờp sền hoàc hươr, thàn tơngai pơrgon sih tam gar sơntìl kàl mrềt prang. Mò Đặng Thị Thủy, Phó Kwang Lam bồ Sờh Broă lơh sa sươn sre mờ Tiah ơm kis pà gĭt:

“Añ kung neh rơcăng lài lơh broă mờ ală mpồl lơh broă sơntìl bè sơntìl kòi nàng drơng ai 171 rbô lồ in den tàm kàl Mrềt prang do rơ̆p lơh niam bè broă lơh sơntìl. Tềng đăp măt rơ̆p dong kờl sơntìl chi lơyah, dăp wàs tus tiah lơi rơ̆p dong kờl ală sơntìl phan tam, rơpung rơpual nàng geh broă lơh broă sa lài gơ in. Ai gơ wèt mờ gah phan puan jơng den pal wàng ròng tơl bơta den bol hi hơ̆ sồng sơnđờm ròng wơl”.

Dơ̆ dà lìu kah yau neh lời wơl khà hoàc hươr is ồn kơn jơ̆ ngan lơh rlau 70 nă cau chơ̆t mờ roh thĭt, rlau 150 rbô nơm hìu gơtìp ngơr bam jrô, 120 nơm hìu ờdiơng jơh; phan puan jơng, phan tam, phan tàm dà mờ ală gùng lòt ndrờm gơtìp lơh aniai jơh. Kờp jơh hoàc hươr kờp dŭ pơgăp 5 rbô 500 tơmàn đong. Củ tịc Anih duh broă Làng bol càr Dăk Lăk ồng Tạ Anh Tuấn sồr ală sờh, gah lơh kràñ tơngai pơrgon bơsong kal ke, ngan ƀañ lời lơyài tŭ làng bol gam kờñ ngan dong kờl jal mhar. Broă tờm là gàr niam lơh sơnơm, tiah ơm kis, gờñ lơh wơl lơh sa mờ bè ờs wơl rài kis ai jơh ală kơnhoàl ù tiah kong gơrềng in.

“Bol he pơn jăt tai jơh nùs jơh tồr nàng lam lơh bơsong kal ke tơnơ̆ dà lìu kung kwơmàng ngan gĭt lơh, dilah gơbàn kòp bơtờp den lơh wơl lơh sa kă bro kal ke ngan. Tŭ do, kơnòl broă bơsong kal ke dà lìu dà kŏ dà ngơr là kwơmàng ngan mờ jal mhar ngan mơya kung pal tàm pơnring nàng lơh bè lơi broă lơh ờ gơtìp gơkòl tàm đah măt tơngai Mŭt”.