Tàm bă mìr ơnàng 7 sào tàm thôn Đồng Giao, sàh Ea M’droh, càr Dăk Lăk, ùr bơklau bi Lý Thanh Tiền (kòn cau Dao) ờ ru tŭ ngan dơr coh ñhơ̆t, klài lơ̆ ai mpồl kơnrồ mờr 10 nơm in sa. Bi yal, mpồl kơnrồ do geh bơtờp sơntìl b ơh dồ yô kơnrồ deh kòn bơh càr dê dong kờl nam 2021. Kơnờm ròng siam sền gàr niam pơgồp bal mờ tam phan, hìu bơnhă bi neh brồ guh klàs rƀah, lơh geh hìu niam tre ngan, ròng siam kòn lòt bơsram.

“Lài do, hìu bơnhă añ là hìu rƀah, geh Dà lơgar dong kờl 1 yô kơnrồ mờ dùl yô be sơntìl, bơdìh hơ̆ tai gam dong kờl bơta chài ròng siam, tam phan nàng hìu bơnhă in bơtàu tơngguh lơh sa ƀươn boài ngan. Tŭ do, hìu bơnhă neh klàs bơh rƀah. Bol hi kơ̆p kờñ ngan Đảng ƀộ càr Dăk Lăk tơngai lơh broă tus pơn jăt tai dong kờl ală broă lơh tơrmù rƀah nàng làng bol tàm thôn in geh bơta brồ guh tơn jơh jơgloh tơrmù rƀah kơnhăp rài kis”.

Tàm ƀòn Cuôr, sàh Ea M’Droh, tiah mờr gơlơh bè jơh ală khà kờp làng bol là kòn cau Rơđê lơm, ồng Y Sắk Kbuôr, Lam bồ ƀòn yal, kơnờm bơta sền gròi bơh Đảng mờ Dà lơgar dê, ală gùng che đèng, dà sàng goh, gùng lòt, hìu bơsram, hìu sơnơm neh geh bơcri ndrờm bal. Bơh ală broă lơh tơrmù rƀah, rlau 120 hìu bơnhă geh dong kờl hìu ơm, chi sơntìl, kòn sơntìl bơtàu tơngguh lơh sa kơnhăp rài kis. Tŭ do, ƀòn gam 40 hìu rƀah, geh tus pơgăp 12%. Ồng Y Sắk đơs: “Bol hi kung kơ̆p kờñ càr pơn jăt tai sền gròi bơcri dong kờl ală hìu gam wơl chi sơntìl, kòn sơntìl nàng làng bol geh bơta nàng klàs bơh rƀah”.

Tơnơ̆ tơmŭt bal mờ càr Phú Yên, càr Dăk Lăk tŭ do geh 3 tơlak 340 rbô nă làng bol, tàm hơ̆ rlau ¼ khà kờp làng bol là làng bol jơi bơtiàn dồ êt nă cau. Kra ƀòn ồng Y Jiê Niê ơm tàm sàh Ea M’droh pà gĭt, broă dong kờl jơi bơtiàn tàm tơngai do neh geh càr Dăk Lăk lơh jăt geh cồng nha. Ƀòn lơgar ngai sơlơ tam gơl pa. Jăt sền pơrjum dờng cau ala măt Đảng ƀộ càr, kra ƀòn ồng Y Jiê Niê kơ̆p gơn: “Làng bol kơ̆p kờñ Đảng ƀộ càr săc rwah geh ală cau jak geh nùs nhơm niam nàng đơng lam làng bol càr ai lơh sa pas pràn rlau, rài kis làng bol hờm ram gơboh gơbài rlau. Làng bol tàm càr rơ̆p geh dong kờl lơh tai ală gơl gùng, bơtơ̆t tơnau dơng dà drơng ngui sa mờ lơh broă sa, lơh hìu bơsram nàng oh kòn in geh bơsram sră wil tơl mờ geh broă lơh broă sa”.

Tơngai lơh broă bơh nam 2020- 2025, càr Dăk Lăk neh lam lơh ndrờm bal ală broă lơh, rơndăp broă lơh tơrmù rƀah tiah làng bol jơi bơtiàn dồ êt nă cau mờ kờp jơh priă tă lơh rlau 4 rbô 220 tơmàn đong. 1 rbô 866 hìu geh dong kờl hìu ơm, 5 rbô 228 hìu geh dong kờl broă lơh broă sa, khà hìu rƀah gơmù sùm bơh pah nam mờ lồi nam 2025 mìng gam rlau 10%.

Ồng Võ Trần Quang, Phó Lam bồ Mpồl Mblàng yal bơto bơtê mờ Hòi jà làng bol càr Dăk Lăk pà gĭt, Jơnau lơh nền tàm Pơrjum dờng tơngai lơh broă bơh nam 2025- 2030 gơ ai geh uă jơnau sồr tam gơl pràn bè bơtàu tơngguh lơh sa – mpồl bơtiàn, mơkung pơn jăt tai ală broă lơh tơrmù rƀah, ngan là tiah jơi bơtiàn dồ êt nă cau.

“Đảng ƀộ càr kung neh gĭt nền kơnòl broă tờm kwơmàng bè broă sền gròi bơcri mờ lơh jăt geh cồng nha ală broă lơh dong kờl jơi bơtiàn tàm tơngai lơh broă do tàm ù tiah càr dê. Tàm hơ̆, lơh ngan gơmù 2% khà hìu rƀah tàm jơh gùt càr mờ gơmù 3% rlau hơđăng tàm tiah làng bol jơi bơtiàn dồ êt nă cau”.

Làng bol ală jơi bơtiàn tàm càr Dăk Lăk dòn kơnờm, kơ̆p gơn bơh Pơrjum dờng Đảng ƀộ càr dơ̆ dùl tơngai lơh broă bơh nam 2025- 2030, càr rơ̆p geh ală broă bơtàu tơngguh tam gơl pràn, rài kis làng bol dê rơ̆p pơn jăt tai tam gơl pràn kơldang.