Tàm dar pơrjum, ală cau ala mat neh cribơyai mờ ring bal ală sră nggal bè jơnau pal jat lơh broă, jàu kơnòl broă mùl màl ai tơl nă cau tàm mpồl mờ tơng gơs 4 mpồl dềt nàng kờñ gàr niam broă sồr lơh, đơng lam geh lơh sùm mờ geh cồng nha tàm jơh gùt tŭ tơngai rơcang tĕ khà. Mò Cao Thị Hoài An, Củ tịc Anih duh broă tĕ khà càr Dăk Lăk đơs loh, broă bơsong jơnau gơ lời wơl tơnơ̆ dà tih gam kơn jơ̆ ngan. Bulah bè hơ̆, khà broă pal lam lơh tàm rơcang lài tĕ khà kung uă ngan sơl, gơ rềng tus uă anih lơh broă, mpồl lơh broă mờ sàh, sơnah ƀòn. Bè hơ̆ den tàng, mờ tŭ tơngai mìng gam rlau 3 nhai, ală kâp, ală gah broă lơh kờñ pal tơrgùm uă ngan rlau jơh, rơcang lài pơgồp bal nền nòn, lam lơh kơnòl broă di tŭ tơngai hơ pơrgon, di jơnau cih adat boh lam dê.

Mho ngai 26/11, Anih duh broă tĕ khà càr Gia Lai neh pơrjum dar dơ̆ 1. Dar pơrjum neh cribơyai, ring bal jơnau rcang cih ală sră nggal bơh Anih duh broă tĕ khà càr dê, yal tam jàu kơnòl broă ai 37 nă cau tàm mpồl in; tă pơgồp jơnau đơs bè khà cau, rơndăp tăp sèng, ală cau tus bal ală mpồl dềt bơh Anih duh broă tĕ khà càr dê; broă rơndăp lơh bè lam lơh broă lơh tĕ khà cau ala mat Quôk hội khoă 16 mờ kwang bàng ala mat Mpồl duh broă Làng bol ală kấp tơngai lơh broă bơh nam 2026-2031 tàm ù tiah càr Gia Lai dê.