Pơrjum dờng cau ala mat Đảng ƀộ càr Dăk Lăk dơ̆ 1, tơngai lơh broă bơh nam 2025 tus nam 2030 geh lơh bơh ngai 29/9 tus ngai 01/10 mờ 449 nă cau ala mat ngan ngồn, ala mat rlau 137 rbô nă đảng viên gùt Đảng ƀộ. Mờ jơnau đơs “Tam klac bal – Làng bol lơh tờm – Duh rơngòt adat boh lam – Tam gơl pràn – Bơtàu tơnguh”, càr Dăk Lăk đal git 4 bơta gơn kơnờm kuơmàng geh: Bơtàu tơnguh cau lơh broă, jak chài – măi mok mờ tam gơl wơl mpồl lơh broă.

Phó Ƀí thư Tỉñ ủy càr, Củ tịc Anih duh broă Làng bol càr ồng Tạ Anh Tuấn pà git, tơngai tus, càr Dăk Lăk lam lơh lơh lài ală broă tam gơl pràn cèng bơta bơnàng jă mờ gơ rề uă, is ồn là phan bơna gùng lòt. Càr tơrgùm priă jền lơh sir ală gùng lòt tờm, gùng rơndeh lòt mhar tơrbŏ bal tiah đah mat tơngai lik – tiah đah mat tơngai mut, anih ơhò ơm tàm dà lềng, ƀlàng rơndeh par mờ ală gơl gùng rơndeh lòt mhar dà lơgar bè tiah đah tô – tiah đah jum dà lơgar, Buôn Ma Thuột – Vân Phong. Bal mờ hơ̆, càr kung lơh pràn tam gơl wơl sră pơ àr gơnoar atbồ, tam gơl pa bồ tơngoh kơlôi sơnơng atbồ nàng kờñ lơh gơlik anih ƀuơn ƀuài, tă bơsong kal ke ai mpồl lơh sa kă bro in, gơ hòi gơ jà bơcri priă, chồl tơnguh lơh sa kơ̆ kơljap sùm.