Jat jơnau yal tàm Pơrjum bơh Anih duh broă Làng bol càr Dăk Lăk dê geh bơyai lơh ngai 08/9, tus ngai 28/8, jơh gùt càr rơp pa ai priă geh rlau 3 rbô 939 tơmàn đong priă bơcri dà lơgar nam 2025, geh 1/3 broă rơndap lơh. Ală rơndap broă lơh dờng bè gùng rơndeh lòt mhar Khánh Hòa – Buôn Ma Thuột, gùng kềng gah dà lềng Phú Yên, phan bơna Tiah lơh sa đah jum Phú Yên, Tiah lơh sa mờ măi mok Hòa Tâm, Anih ơhò ơm Bãi Gốc… ndrờm gơtìp gơ kòl bè sră pơ àr mờ ai ù lơh rơndap broă.

Tàm tŭ hơ̆, uă rơndap broă lơh bơdìh kes priă dà lơgar bè Mpồl tơrgùm bal kă bro phan – broă drơng ala, ală tiah lòt nhơl niam chài brê bơnơm, tiah lơh sa mờ măi mok pa kung lơyài lam lơh. Tềng đap bơta geh ngan do, ồng Tạ Anh Tuấn, Củ tịc Anih duh broă Làng bol càr Dăk Lăk sồr ală sờh, gah broă lơh, ală tiah pal kràñ cê tơnguh mhar tơngai ai priă bơcri dà lơgar, sền do là kơnòl broă tờm nàng lơh geh gơguh lơh sa. Ală bơta gơ kòl bè ù tiah, tơm wơl priă ai ù, sră pơ àr bè tiah ơm kis, bơt bơtàu pal geh tơrgùm tă bơsong mơ tơn tàm nhai do. Kuơmàng, Củ tịc Anih duh broă Làng bol càr Dăk Lăk sồr kràñ cê ờ lời ală cau tờm lơh rơndap broă ờ geh pràn jak tus bal dờp lơh ală rơndap broă lơh, pleh bơta lơyài tơngai lam lơh, tơnguh priă bơcri, lơh gơmù cồng nha ngui priă bơcri dà lơgar. Bal mờ jơnau sồr lơh mhar broă ai priă bơcri dà lơgar, Anih duh broă Làng bol càr Dăk Lăk sồr kờp sền, tam gơl broă rơndap lơh bơcri priă dà lơgar nam 2025, tơrgùm priă bơcri ai ală broă lơh cèng bơta gơn kơnờm, geh bơta pràn ai priă bơcri uă in, rơcang lài broă rơndap lơh bơcri priă dà lơgar di mơ tơngai, bơh nam 2026 tus nam 2030. Jơnau kờñ là lơh gơlik bơta tam gơl loh làng tàm tơngai lam lơh ală rơndap broă lơh tờm, pơgồp bơnah lam lơh jơnau kờñ gơguh lơh sa rlau 10% tàm tŭ tơngai tus.