Jat jơnau đơs, broă lơh đơng lam, sồr lơh geh lam lơh kràñ cê jơh nùs, dơ̆ lĕ bal; ală anih lơh broă geh gơnoar rcang lài gĭt ală bơta, di tŭ gĭt gŏ, bơsong uă broă, pơgồp bơnah bè ờs wơl lơngap lơngai cíñ trị mờ lơh kơ̆ bơta pin dờn bơh làng bol dê. Tàm tơngai lơh broă, bơh lòt sền tàm dơlam is, càr gĭt gŏ 12 dơ̆ sa kuề sa kuà. Broă lùp sền gĭt gŏ 10 dơ̆ broă geh tềl tơngŏ lơh tìs mờ jàu anih lơh broă lùp khàu in. Pal sền gròi ngan là, càr Dăk Lăk tơrgùm kờp sền, bơsong ală rơndăp broă lơh lơyài tŭ tơngai lơh broă, gơ kòl jŏ tơngai, pơhìn lơh hoàc huơr, pơhì pơhà. Bè phan bơna dà lơgar dê tơnơ̆ tŭ tơmŭt bal, jơh gùt càr geh rlau 4 rơbô anih lơh broă; tàm hơ̆ gam mờr 400 anih lơh broă jơng kah kờñ pal gờñ geh broă lơh bơsong.

Ƀí thư Tỉñ ủy càr Dăk Lăk ồng Lương Nguyễn Minh Triết sồr ală kấp lơh jat niam gùng dà broă lơh “Ờ gơtùi, ờ khin, ờ kờñ, ờ duh pal sa kuề sa kuà”, lơh pràn bơto bơtê nùs nhơm lơh kơnòl broă dà lơgar dê, lơh jat tềm pềr, song dơ pă, mờ bơsong jơh jơtài phan bơna dà lơgar dê jơng kah.