Broă rơndăp lơh sồ 60 ngai 18/09, Anih duh broă Làng bol càr Dăk Lăk sồr ală ƀòn lơgar tơrgùm kờp sền nền wơl, rơndăp tăp sèng mờ lơh dipal ală jơnau yal tơnggĭt ù tiah sră pơ àr gơnoar ătbồ, mơkung jòi tơrgùm, lơh sồ jơh sră pơ àr làng bol dê bè Sră cơng tàng gơnoar ngui ù, hìu ơm, kan kươk làng bol nàng cih bơtơl tàm ală jơnau yal ù tiah.

Tơnơ̆ 1 nhai lam lơh, broă lơh dipal jơh sră wăc rùp ù tiah gơnoar ătbồ neh lơh sir jơh tàm jơh 102 sàh; rlau 3 tơlak 400 rbô bă ù neh geh pà màh sơnđah măt. Bulah bè hơ̆, jơh gùt càr kung gam sơl pơgăp 520 rbô bă ù ờ hềt tam toh jơnau yal să tờm. Nàng lơh jăt di tơngai, Anih duh broă Làng bol càr Dăk Lăk sồr ală ƀòn lơgar pal mhar pồ tơl mpồl lơh broă, jàu kơnòl loh làng, sơlơ pơgồp bal tai mờ lơh pràn mblàng yal tus tơl thôn, ƀòn, jơnum làng bol tiah drà nàng làng bol in wă wờng loh mờ yal tơnggĭt sră nggal wil tơl. Broă lơh anih jơnau yal tơnggĭt ù tiah là broă lơh kwơmàng tàm ală broă lơh bơ̆t bơtàu gơnoar ătbồ sồ, mpồl bơtiàn sồ mờ lơh sa sồ, tơngguh uă bơta niam drơng broă dà lơgar, tơrmù priă tă lơh broă sa priă ai làng bol mờ mpồl lơh sa kă bro in.