Đơs tàm dơ̆ bơyai lơh, Củ tịc Mpồl duh broă Làng bol càr Dăk Lăk mò Cao Thị Hòa An kah wơl gùng lòt 95 nam kờp bơh tŭ Ci ƀộ Đảng Kộng sản sơn rờp bơh Phú Yên dê geh tơnggơs ngai 5/10/1930 tàm ƀòn Đồng Bé, thôn Phước Long, sàh Xuân Long, kơnhoàl Đồng Xuân, tŭ do gơwèt sàh Đồng Xuân, càr Dăk Lăk.

Ci ƀộ tŭ hơ̆ geh 9 nă đảng viên, bơh ồng Phan Lưu Thanh lơh Ƀí thư. Lòt gan 95 nam, bơh Ci ƀộ sơn rờp mờ 9 nă đảng viên, tus tŭ do, tơnơ̆ tŭ tơmŭt bal Đảng ƀộ Phú Yên mờ Dăk Lăk, jơh gùt càr neh geh rlau 137 rơbô nă đảng viên; 100% thôn, ƀòn, tiah ơm kis ndrờm geh Ci ƀộ Đảng, đơs nền gơnoar tờm cíñ trị, bơnàng jă kơ̆ kơnhăp tàm ală anih lơh broă cíñ trị ƀòn lơgar.