Do là dùl broă lơh kwơ màng cíñ trị, mpồl bơtiàn mờ bơta niam kòn bơnus uă ngan, ai tơngŏ nùs nhơm “Gùt lơgar wèt tus tiah nhàr lơgar, tài rơnàng tơnơ̆ do oh kòn làng bol ală jơi bơtiàn in”. Thủ tướng Cíñ phủ ồng Phạm Minh Chính tus sơn đờm mŭt lơh tàm anih pờ tơlik tờm: Hìu bơsram ơm sa bic tơn bàr kấp, kấp 1 mờ kấp 2 sàh Yên Khương, càr Thanh Hoá.

Đơs nền Đảng, Dà lơgar he sùm sền broă bơto bơtê mờ bơsram là broă lơh lài ngan, mờ gơnoar kwơ màng, ai geh bơnàng jă nàng lơh gơs mờ bơtàu tơnguh nùs nhơm niam, bơta pràn kòn bơnus dê, là bơta tờm ai geh cồng nha, Thủ tướng pà git, Ƀộ Cíñ trị neh ring bal mờ tơrgùm đơng lam, sồr lơh jăt gùng dà broă bơcri priă tàm ală hìu bơsram ơm sa bic tơn bàr kấp, kấp 1 mờ kấp 2 tàm 248 sàh tiah nhàr lơgar tàm ù gờl. Nàng gàr niam broă ai ală hìu bơsram pa mŭt lơh broă drơng nam bơsram pa 2026- 2027 in, Thủ tướng sồr Ƀộ Bơto bơtê mờ Bơsram, kwang đơng lam bồ ală càr sùm tus sền broă lơh, di tŭ bơsong ală kal ke, gơkòl, dong kờl ală cau lơh, mpồl lơh, pơlam jăt sền geh tơl lơh broă niam, lơh hìu bơsram mờ nùs nhơm lơh ngan, lơh ngan uă ngan – jơh ală tài ală rơnàng kơnòm bơsram kờñ gơboh, tài broă bơtàu tơnguh làng bol ală jơi bơtiàn tiah nhàr Dà lơgar.

Tàm càr Dăk Lăk, Phó Thủ tướng Cíñ phủ ồng Mai Văn Chính neh tus bal dơ̆ sơnđờm mut lơh Hìu bơsram ơm sa bĭc tơn tàm hìu bơsram kấp dùl mờ kấp bàr tàm sàh tiah nhàr lơgar Ia Rvê, càr Dăk Lăk. Tàm dơ̆ sơnđờm mut lơh, Phó Thủ tướng ồng Mai Văn Chính neh sồr sơnđờm mut lơh hìu bơsram mờ pà phan ai kơnòm bơsram mờ cau pơgru in, pơndờm pơnđiang lơh ngan sơr lèt gan kal ke, rcang gàr broă bơto niam - bơsram niam.

Bal mờ broă lơh bơt bơtàu tàm sàh Ia R’vê, tàm dơ̆ do càr Dăk Lăk gam sơnđờm mut lơh 2 hìu bơsram ơm sa bĭc tơn tàm hìu bơsram ndai: Hìu bơsram ơm sa bĭc tơn tàm hìu bơsram sàh Ia Lốp geh priă bơcri lơh là 105 tơmàn đong, Hìu bơsram pe kấp sàh Buôn Đôn geh bơcri priă lơh rlau 158 tơmàn đong. Ală hìu bơsram geh lơh dờng bơh 900 tus rlau 1 rơbô 100 nă kơnòm bơsram.

Tàm càr Lâm Đồng, Phó Thủ tướng Cíñ phủ ồng Hồ Đức Phớc tus sơn đờm mŭt lơh Hìu bơsram ơm sa bic tơn 2 kấp, kấp 1 mờ kấp 2 Thuận An. Hìu bơsram pa geh lơh dờng niam rơ̆p là anih bơsram, ròng rơlao 1 rơbô nă kơnòm bơsram ală jơi bơtiàn tàm sàh tiah nhàr lơgar Thuận An, càr Lâm Đồng geh lơh tàm bă ù ơnàng 5 lồ, kờp jơh priă bơcri rơlao 225 tơmàn đong.

Đơs tàm dơ̆ sơn đờm lơh, Phó Thủ tướng sồr Ƀộ Bơto bơtê mờ Bơsram bal mờ càr Lâm Đồng mờ ală mpồl lơh broă gơrềng bal pal sền gròi đơng lam, sồr lơh, sền gròi, jăt sền lơh bè lơi nàng hìu bơsram geh lơh gơs di tơngai geh ai, kơl jăp mờ ală bơta gơrềng bal, tàm hơ̆ uă ngan là cau lơh broă, priă tă nàng gơtùi ngui geh cồng nha, kơl jăp tus 100 nam.