Drim do 5/09, tàm Anih tờm Pơrjum Dà lơgar, Hà Nội, Ƀộ Bơto bơtê mờ Bơsram bơyai lơh dơ̆ tơngkah kir sơnrai 80 nam bơhiàn gah Bơto bơtê mờ sơnđờm mut nam bơsram pa 2025-2026. Do là dơ̆ sơn rờp mờr 30 tơlak nă kơnòm bơsram, cau bơsram dờng bal 1 tơlak 700 rơbô nă cau pơgru tàm jơh gùt lơgar tus bal dơ̆ sơnđờm mut nam bơsram pa bal, tàm tơrbŏ bal pờ tàm internet, gờm chờ bal bồng bi mờ đơs Jơnau đơs crih Dà lơgar.

Tus bal dơ̆ bơyai lơh geh Tổng Ƀí thư ồng Tô Lâm, Củ tịc lơgar ồng Lương Cường, Thủ tướng Cíñ phủ ồng Phạm Minh Chính, Củ tịc Quôk hội ồng Trần Thanh Mẫn bal mờ đơng lam bồ, lài do là đơng lam bồ Đảng, Dà lơgar; ala mat ală Ƀộ, mpồl, gah broă mờ ală mpồl Ală lơgar tàm Việt Nam. Nam bơsram 2025 - 2026 geh sền gĭt là nam bơsram sơn rờp lam lơh ală Jơnau lơh nền tàm pơrjum kwơ màng bơh Đảng mờ Quôk hội dê, tàm hơ̆ geh Jơnau lơh nền tàm pơrjum bè bơto bơtê mầm non ai kơnòm dềt bơh 3 tus 5 sơnam in, Adat Cau pơgru mờ broă lơh ờ sa priă bơsram.

Gah bơto bơtê sền gĭt tơngume nam bơsram 2025-2026 là “Duh rngòt kơrnoat boh lam- Bơceh lơh- Tam gơl pràn- Bơtàu tơnguh” mờ 10 kơnòl broă, broă lơh tờm nàng kờñ lơh jat geh cồng nha ală gùng dà broă lơh bơh Đảng mờ Dà lơgar dê bè bơto bơtê mờ bơsram, lơh tus geh ală jơnau kờñ geh ai. Dơ̆ tơngkah kir sơnrai 80 nam bơhiàn gah Bơto bơtê mờ Sơnđờm mut nam bơsram pa 2025 – 2026 ờ mìng kah wơl bơhiàn yau, cih dờp ală tă pơgồp dờng màng bơh gah Bơto bơtê gơwèt mờ broă lơh kăc màng bơh Đảng mờ Dà lơgar he dê lơm mờ gam là dơ̆ nàng lơh kah wơl kơnòl tàm jơh gùt gah Bơto bơtê is mờ jơh gùt mpồl bơtiàn tềng đăp jơnau kờñ bơtàu tơnguh bơh Dà lơgar dê tàm rài pa.