Ală cau ala mat đơs niam ală bơta pa cèng bơta tam gơl pràn bè koh tơrmù, lơh ƀuơn sră pơ àr, tơrmù lơyah mờ lơh loh ală rơndap broă lơh pal ring bal jơnau lơh nền bơcri priă, lơh gơlik bơta lòng làng gah broă kă bro cèng bơta pal jat, lơh pràn broă tam pà kâp, jàu gơnoar, ring bal jơnau lơh nền bơcri priă ai Thủ tướng Cíñ phủ mờ Củ tịc Anih duh broă làng bol kâp càr in. Tă pơgồp jơnau đơs tàm jơnau rơcang cih, ală cau ala mat ring bal mờ broă bơ tơl jơnau cih ờ ai tac bro jràu điện tử mờ jràu chu duh, mờ kung sồr bơtơl nhơm N20 mờ ală bơta lơh gơ chul bồ tơngoh pa cih tàm mat gah broă ờ ai bơcri priă kă bro, nàng kờñ sền gàr mpồl bơtiàn. Tơngume geh uă cau ala mat sền gròi là bè broă lơh dong kờl bơcri priă mờ đơs sùm bơta pal geh bơh broă pal đal git loh bơta geh ngan đah dong gơnoar kuơ mờ dong kờl. Dong kờl bơcri priă kờñ pal tơrgùm uă ngan rlau jơh tàm ală gah broă kuơmàng, ai lài tàm lơh sa bồ tơngoh jak mờ măi mok pa.