Tàm hìu sră dờng bè: Hìu sră Bơto bơtê, Lý Thường Kiệt, Hai Bà Trưng…bơh càr Dăk Lăk dê, khà mè bèp mờ kơnòm bơsram lòt blơi phan gơguh pràn, is ồn tàm ală trồ mang mờ ngai lồi poh. Ală pang sră bồ kâp bè ơdŭ 1, ơdŭ 6 mờ ơdŭ 10 sùm ơm tàm mpồl tăc yòm mhar ngan. Dùl nă mè bèp kơnòm bơsram tàm sơnah ƀòn Tân Lập yal: “Ală bơta sră tàm do rơ̆ ru bơcah bơcài ngan bal mờ păng sră, bơh sră măy, sră sền nàng gĭt tus sră pơ àr dong kờl. Giă tăc blơi kung di yal sơl. Añ mìng dờp măt sră hìu bơsram pà là cau lơh broă ai wil tơl tơn mhar ngan, ƀươn soh ngan”.

Nàng kờñ tăc tơl ai drà in, Kông ty Pơgồp bal priă Sră mờ Phan ngui hìu bơsram Dăk Lăk neh blơi rê rlau 4 tơlak pang sră (ndrờm mờ 45 tơmàn đong), rlau 1 tơlak pang sră cih (mờr 4 tơmàn đong) mờ pơgăp 25 tơmàn đong ai phan ngui cơldŭ lơh broă, phan ngui bơsram in. Ồng Trương Văn Băng- Kwang Lam bồ Kông ty đơs nền: “Kông ty drơng wil tơl ai jơh ală kơnòm bơsram in. Bol hi hơ ờ siơ̆u dùl pang sră lơi, phan ngui bơsram mờ ală phan ngui bơto bơsram ai nam bơsram pa in”.

Bal mờ drà sră, phan soh ndrờm bal kơnòm bơsram in kung mŭt tàm tơngai blơi uă sơl. Ală hìu ràng tăc phan soh ndrờm bal tàm sơnah ƀòn Buôn Ma Thuột mờ uă sơnah ƀòn, sàh neh rơcăng phan tăc bơh gờñ, phan bơna rơ̆ ru, bơcah bơcài, dipal mờ tơl hìu bơsram. Bi Nguyễn Thị Mỹ Trang dùl nă mè kơnòm bơsram dê ơm tàm sơnah ƀòn Thành Nhất pà gĭt: Giă phan soh ndrờm bal kơnòm bơsram in nam do ờ gơguh, pơgăp bơh 180 rbô tus 350 rbô đong dùl ƀộ; phan soh ndrờm bal tàp pràn să jan pơgăp 80 rbô tus 200 rbô đong dùl ƀộ. Bi geh jơnau kờñ blơi àu mpha mai lài ala tài sồr mai bơh lài, tềm pềr priă tă mơkung bơcah bơcài tai.

“Añ lam bàr nă kòn lòt blơi phan soh ndrờm bal kơnòm bơsram in, tàm hìu ràng tăc neh geh lài phan soh bơh hìu bơsram dê den tàng ƀươn ngan. Dờng dềt rơ̆ ru bơh ào, ồi mbơn, biài, giă tăc blơi kung dipal sơl”.

Pal sền ngăc là nam do ală phan bơna drơng nam bơsram pa geh lơh tàm lơgar geh tus 70- 80% tàm drà. Ală măt kă bro Việt Nam dê neh geh uă tam gơl niam bè rùp rài, bơta niam, giă tăc blơi dipal, geh mè bèp kơnòm bơsram pin dờn săc rwah. Do kung là cơng tàng tơnggŏ loh làng ai cồng nha bơh dơ̆ hòi jà “Cau Việt Nam ai lài ngui phan Việt Nam”. Mò Phạm Thị Kim Anh- cau tờm hìu ràng tăc phan soh ndrờm bal Bi Phạm tàm sơnah ƀòn Buôn Ma Thuột, càr Dăk Lăk pà gĭt: “Tàm kàl lòt bơsram, hìu ràng tăc phan pờ mpồng bơh 6 jiơ drim nàng mè bèp kơnòm bơsram ƀưon blơi. Phan geh lơh tàm ală hìu măy dờng tàm lơgar, phan geh rơ̆ ru bơcah bơcài, phan niam sùm. Bol hi sền gròi jơh bal gùng mai, bơta biài nàng kơnòm bơsram soh gơ in niam sùm ngai bơsram”.

Bal mờ bơta rơcăng lài sir tơl bơh ală mpồl tăc sră dê, hìu ràng tăc phan soh ndrờm bal mờ ală anih tăc bro uă làm bă tiah, mè bèp mờ kơnòm bơsram Dăk Lăk gơtùi iang nùs lài mờ ngai sơnđờm mŭt nam bơsram pa.