Tơnơ̆ tŭ pồ tơl, Đảng ƀộ càr Gia Lai tŭ do geh 74 mpồl đảng kâp hơđơm bal mờ kờp jơh rlau 10 rbô 800 nă đảng viên. Sền swì tơl làm cồng nha mờ bơta ờ hềt pràn jak bơh tơngai lơh broă pa do dê, Pơrjum dờng geh jơnau kờñ geh bơta tam gơl pràn tàm tơngai lơh broă bơh nam 2025- 2030. Tàm hơ̆, gơguh GRDP kờp bal pah nam geh rlau 10%; kờp bal priă lơh geh nam 2030 geh rlau 6 rbô 300 dolar Mỹ, jơh gùt càr ờ gam hìu rƀah; Kờp jơh rề dia tus nam 2030 geh rlau 41 rbô tơmàn đong mờ kờp jơh priă geh bơh tăc phan mờ lơgar ndai rlau 17 tơmàn dolar Mỹ.

Nàng lơh geh ală jơnau kờñ geh ai, Đảng ƀộ càr Gia Lai gĭt nền 5 jơnau kờñ tờm gơguh tờm, geh: Tơrgùm tàm lơh sa mờ măy mŏk lơh gơlik phan, lơh mòn, năng lượng lơh geh wơl, lơh sa mờ măy mok tơlir, ƀan zân mờ AI. Ai lòt nhơl gơgơs lơh sa tờm jăt tàm bơta ƀươn dà lềng, ƀòn brê bơnơm, niam chài. Wèt tus broă lơh sa sươn sre măy mŏk pa, broă brê bơnơm kơ̆ kơl jăp, lơh gơs ală tiah mìng tam phan dờng bè broă lơh sa sươn sre – lơh sa mờ măy mok. Lơh gơs ală anih tờm logistics jăt gah Gùng dà lơgar 19 mờ gùng rơndeh lòt mhar Quy Nhơn – Pleiku. Lơh tiah drà mhar mờ kơ̆ kơl jăp, gơ jăt bal mờ drà ù tiah hìu đam.

Ồng Hồ Quốc Dũng, Kwang bàng Đảng Dà lơgar, Ƀí thư Tỉñ ủy càr Gia Lai sồr Đảng ƀộ Anih duh broă Làng bol càr yờ tơngguh nùs nhơm geh kơnòl, tam klăc, tam gơl pa, tam gơl pràn tàm bồ tơngoh kơlôi sơnơng, kràñ cê jơh nùs tàm lơh broă nàng sơrlèt rlau kal ke, bơta lòng. Càr tơrgùm lơh jăt 6 kơnòl broă tờm. Tàm hơ̆, pal yờ tơngguh uă cồng nha tă pơgồp jơnau đơs kwơmàng ai  Tỉñ ủy càr, Mpồl Lơh kơnòl broă sùm Tỉñ ủy càr in bè bơtàu tơngguh lơh sa – mpồl bơtiàn, sền gàr dà lơgar, lơngăp lơngai mờ mŭt gơrờm bal ală lơgar; đal gĭt di “anih gơkòl”, “tiah gơrềt” nàng geh broă lơh tam gơl pràn tă bơsong; tơrgùmk ai priă bơcri dà lơgar, gơhòi gơ jà bơcri priă bơdìh kes priă dà lơgar, tơngguh lơh broă bal cau lơh broă bal đah dà lơgar mờ làng bol; bơtàu tơngguh rơndăp tăp sèng phan bơna ndrờm bal, tàm tơrbŏ tiah; tam gơl broă lơh gơguh gơ jăt bal mờ lơh sa tơlir, lơh sa tàm pơdar, lơh sa sồ; bơtàu tơngguh broă lơh sa sươn sre ngui măy mok pa, lơh sa mờ măy mok lơh gơlik phan, năng lượng lơh geh wơl, lòt nhơl; gàr niam rài kis mpồl bơtiàn, tơngguh uă rài kis Làng bol, ngan là tàm tiah làng bol jơi bơtiàn dồ êt nă cau, tiah sar, tiah ngài. Ƀí thư Tỉñ ủy càr Gia Lai ồng Hồ Quốc Dũng đơs sùm:

“Sồr Đảng ủy Anih duh broă Làng bol càr khoă pa sơrbăc mhar bơsram kơlôi sơnơng mblàng yal jrô Jơnau lơh nền tàm pơrjum bơh Pơrjum dờng tơl nă kwang bàng, đảng viên mờ làng bol geh broă lơh lơh broă mờ broă rơndăp lơh lam lơh loh làng jăt tơl jơnau kờñ kơnòl broă. Gĭt nền loh tŭ tơngai mờ bơta pràn, lơh mpồl jăt sền, sền swì, chồl bơtrồt sùm, di tŭ tă bơsong kal ke gơkòl, nàng jơnau lơh nền tàm pơrjum gờñ lòt mŭt tàm rài kis, lơh gơlik bơta loh làng tơn bơh ală ngai sơnrờp, nhai sơnrờp, pe nhai sơnrờp bơh tơngai lơh broă dê”.

Mờ bơhiàn tam klăc bal, kơ̆p kờñ ngan bơtàu tơngguh, nùs nhơm tam gơl pa mờ jơh nùs lơh ngan lơh broă, Đảng ƀộ Anih duh broă Làng bol càr Gia Lai rơ̆p lơh niam gơnoar broă mpồl cau tờm, lơh lài tàm tam gơl pa, ngui măy mŏk jơh rài lơh sră pơ àr gơnoar ătbồ; pơnđơl lơh sir geh cồng nha ală jơnau kờñ, kơnòl broă bơh Jơnau lơh nền tàm pơrjum bơh pơrjum dờng tơngai lơh broă bơh nam 2025- 2030, pơgồp bơnah bơ̆t bơtàu càr Gia Lai bơtàu tơngguh mhar, tơlir, kơ̆ kơl jăp, gơgơs càr bơtàu tơngguh đau bơh jơh gùt lơgar dê.