Tàm Anih tờm pơrjum càr Gia Lai, Mpồl Mblàng yal bơto bơtê mờ Mpồl Hòi jà Làng bol Tỉñ ủy càr Gia Lai pa bơyai lơh Pơrjum jờng rơ 62 nă cau pơnrơ ngan “Chài hòi jà làng bol” tơngai bơh nam 2020- 2025. Jơh gùt càr tŭ do lơh mờr 6 rbô broă lơh “Chài hòi jà làng bol” tàm uă broă, cèng wơl cồng nha geh kwơ ngan ngồn mờ pràn lơh gơrề làm uă. Tàm bơtàu tơngguh lơh sa – mpồl bơtiàn geh ală broă lơh pơnrơ ngan bè: “Ròng kơnrồ deh kòn”, “Tam ñhơ̆t ròng be bơtờp sơntìl pa”, “Tam kơphê bơrlŭ bal”, “Pờ àng gùng ƀòn”, halà “Ơruh pơnu geh nùs nhơm dong kờl is tam gơl sồ”.

Tàm broă lơh sền gàr dà lơgar- lơngăp lơngai, pơnrơ ngan là ală broă lơh “Jơnum ătbồ is lơngăp lơngai rơndăp tăp sèng”, “Ơruh pơnu lam lài tus bal sền gàr niam lơngăp lơngai rơndăp tăp sèng, rơcăng ồs sa crùh ồs sa, dong kờl cau dong kờl rềs àr”…Ală broă lơh neh lơh jăt niam gơnoar broă kwang bàng, cau ling mờ làng bol tàm bơtàu tơngguh lơh sa, gàr kơnhăp sền gàr dà lơgar- lơngăp lơngai.