Lơh jăt “Broă lơh Quang Trung” bơh Thủ tướng Cíñ phủ dê hòi jà lam lơh, bơh ngai 01/12, ală mpồl lơh broă mpồl ling klàng lơh pôs đồng ling tàm ù tiah càr Gia Lai neh dồ ròt lam lơh dong kờl lơh 100 nơm hìu ai ală hìu làng bol gơtìp tơrlơm tàm dơ̆ mìu càl rbŭt dờng dà tih dà lìu pa do. Tàm broă lơh do, Ling mpồl 34 dờp lơh 70 nơm hìu, Gah Đơng lam Ling klàng càr Gia Lai drơng kơnòl 30 nơm hìu gam wơl.

Ală mpồl pơgồp bal niam mờ gơnoar ătbồ ƀòn lơgar nàng kờp sền nền wơl di cau dờp ngui, rơcăng wil tơl phan bơna, mpồl cau, anih ơm anih sào mờ rơndeh rơndồ măy mŏk phan ngui lơh broă ai ală jơnum mpồl lơh in. Ală mpồl lơh broă pơnđơl lơh sir, tàm jàu jơh 100 nơm hìu lài mờ ngai 31/01/2026, dong làng bol di tŭ wă rò Sa tềp bơhiàn dà lơgar dê tàm ală hìu pa niam lơngăp lơngai, kơ̆ kơl jăp.

Kung tàm ngai òr (01/12), Củ tịc Anih duh broă Làng bol càr Lâm Đồng ồng Hồ Văn Mười đơng lam pơrjum pờ tơlik tơn tàm internet mờ tiah, sồr mhar lơh pa mờ lơh niam wơl hìu ơm ai ală hìu bơnhă làng bol gơtìp hoàc huơr tài dơ̆ mìu dà tih, dà lìu pa do. Gùt càr geh 76 nơm hìu gơtìp tơrlah tơrlơm jơh mờ 749 nơm hìu gơtìp ờ niam, tàm hơ̆ sàh D’Ran là sàh kong hoàc huơr kơn jơ̆ ngan rlau jơh mờ 46 nơm hìu gơtìp ờ niam, 17 nơm hìu tơrlơm mờ 6 hìu bơnhă làng bol kis kềng gah dà dờng Dà Nhim pal ntrờn jal mhar, gơ wèt mpồl hìu bơnhă geh rơndap ù ơm kis pa.

Càr ring bal khà dong kờl 120 tơlak đong gơ wèt mờ tơl nơm hìu gơtìp tơrlah tơrlơm mờ bơh 20 tus 40 tơlak đong ai ală hìu kờñ lơh niam wơl; mờ kung sồr ală tiah jat sền nền nòn broă ngui priă jền di jơnau kờñ mờ jal mhar rơndap ai ù ơm ală hìu bơnhă ờ hềt geh ù in, gàr lơh gơs broă lơh niam wơl hìu lài mờ sa tềp bơhiàn dà lơgar nam 2026.