Dơ̆ mìu dờng tàm bồ nhai 9 pa do neh lơh gơbàn ngơr bam jrô uă ƀòn làng bol ơm kis, lơh aniai 240 lồ kòi, phan tam lơyah ngai bơh 600 hìu bơnhă làng bol dê bal mờ phan bơna gùng lòt, rbòng dà gơtìp tơrlah. Ƀí thư Anih duh broă Đảng sàh, ồng Phạm Văn Phương pà git, broă ntrờn là broă lơh kuơmàng ngan rlau jơh nàng tơn jơh bơta do. Sàh neh lơh rơndap ù tiah bal, rơ wah bă ù dà lơgar rềp gùng dà lơgar 25 mờ anih tờm niam chài sàh nàng rơndap ƀòn ơm kis pa mờ ơnàng tơl bă ù mờr 580 thơk vuông, ờ mìng dong geh ù ơm mờ gam geh suơn mờ anih ròng phan tai. Dilah geh càr ai priă jền lam lơh, rơndap broă lơh gơtùi lam lơh mơ tơn, dong làng bol iang nùs ơm kis jŏ jòng, ờ gam pal kơlôi rơcang lài mờ nhai mìu dà kŏ dà cò tai.