Anih cribơyai là dùl mpồl tìp măt tơm bơh bơr sùm mờ kơ̆ kơl jăp đah Cíñ phủ Việt Nam mờ mpồl bơtiàn mpồl lơh sa kă bro nàng kờñ lơh niam wơl ală jơnau sồr kă bro kờñ ngan nàng ai tơl bơta bơtàu tơngguh bơh gah mpồl lơh sa kă bro làng bol dê lơh is in, lơh ƀươn ƀoài tiah bơcri priă, tă pơgồp tàm bơta gơguh lơh sa kơnhăp jŏ bơh Việt Nam dê. Tàm anih cribơyai, ală mpồl lơh sa kă bro jờng rơ ală tam gơl bè bơta wèt sền bơtàu tơngguh bơh Việt Nam mờ đơs là, broă ai lơh jăt ală jơnau lơh nền tàm pơrjum bè: Jơnau lơh nền tàm pơrjum 57 bè chồl tơngguh jak chài, măy mŏk mờ tam gơl pa bơceh lơh; Jơnau lơh nền tàm pơrjum 59 bè rơcăng lài mŭt gơrờm bal ală lơgar; Jơnau lơh nền tàm pơrjum 68 bè bơtàu tơngguh lơh sa làng bol dê lơh is mờ Jơnau lơh nền tàm pơrjum 66 bè lơh tam gơl pa wơl broă lơh bơ̆t bơtàu mờ lơh jăt kơrnoăt boh lam…

Ală jơnau đơs jơnau dan jơnau sồr Cíñ phủ ai lơh jăt bơto pơlam mờ tŭ tơngai loh làng nàng tơn rềp bơta ờ ndrờm bal đah dà lơgar mờ ƀòn lơgar, gàr niam bơta ring bal tàm ătbồ broă tàm gùt lơgar. Đơs tàm Anih cribơyai, Thủ tướng ồng Phạm Minh Chính yal dồ êt broă lơh sa, mpồl bơtiàn Việt Nam dê mờ đơs sùm: Việt Nam gĭt nền jơnau kờñ gơguh 8% tàm nam 2025 mờ 2 nơm khà tàm ală tŭ tơngai pơn jăt tai, tàm hơ̆ lơh pràn bơtàu tơngguh lơh sa tơlir, lơh sa sồ là jơnau gơ sồr, jơnau sồr pal lơh, dipal mờ gùng dà bơtàu tơngguh. Cíñ phủ rơ̆p tơrgùm sồr ală ƀộ, gah, ƀòn lơgar mhar lơh broă, lơh ngan, jơh nùs lơh ngan bơsong tơl ală kal ke, tam klăc, rơcăng lài gơdờp, ngăc ngar, jak chài, geh cồng nha, jơh nùs tam gơl pa, bơceh lơh. Thủ tướng dòn kơnờm mpồl bơtiàn mpồl lơh sa kă bro FDI rơ̆p pơn jăt tai lòt bal mờ Việt Nam, bơceh lơh bal dùl rài lơh sa tơlir, tàm pơrlòng mờ kơnhăp jŏ, tài pas sơm bal bơh jơh gùt kơnhoàl ù tiah do mờ dunia dê.