Gùng dờng Dà lơgar 26, sùm tàm 40 kơi sồ bơh Buôn Ma Thuột, kàl do sùm gơ kòl rơndeh uă ngan. Rơndeh container, rơndeh dờng pơndiang phan kơn jơ̆, rơndeh pơndiang phan lơh geh bơh broă lơ sa suơn sre mờ bal mờ rơndeh măi pơndiang sầu riêng, tàm rơndăp rơndồl tàm gùng lòt hăt hal ngan. Pah dơ̆ geh rơndeh container trơwơl bồ, gùng lòt tàm gơl gùng dờng do sơlơ kal ke ngan. Bi Đinh Quang Huy, làng bol ơm tàm sàh Ea Knuếc pà gĭt: “Bàr pe nam pa do, broă rơndeh lòt rê jun pơndiang phan lơh geh bơh broă lơh sa suơn sre, is ồn là sầu riêng gơguh pràn neh lơh bơta tơrgùm, gơ kòl gùng lòt gơlik geh sùm jơh bal ngai mờ mang tơn. Añ dan mờ Dà lơgar gờñ bơcri priă lơh pờ ơnàng gơl gùng nàng làng bol in lòt rê, jun pơndiang phan bơna ƀuơn ƀoài rlau tai”.

Bi Trần Văn Định, dùl nă cau măi rơndeh container mờ rlau 10 nam mờng chài jun pơndiang sầu riêng tăc mờ lơgar ndai mờ lòt tàm ală càr, ƀòn dờng pà gĭt: “Lài do, tŭ Sầu riêng ờ hềt geh uă geh ết phan bơna, den lòt bơh Krông Pách guh Buôn Ma Thuột mìng roh pơgăp bơh 25 tus 30 phuk lơm. Mơya tŭ do, mpồl sầu riêng uă, rơndeh jun pơndiang gơguh pràn lơh bơta gơ kòl gùng kơn jơ̆, lòt gơl gùng pơgăp 30 kơi sồ roh tus bơh 1 tus 2 jiơ, geh tŭ jŏ rlau tai. Dilah 2 nơm rơndeh Continer mờ lòt sơlơ̆u wơl den lòt jơh gơl gùng bơh rơndeh ndai dê, ngòt rơngơ̆t ngan. Oh mi cau măi rơndeh kơ̆p kờñ Dà lơgar bơcri priă lơh pờ ơnàng gơl gùng nàng broă jun pơndiang phan bơna ƀuơn rlau tai”.

Trung tá Lương Xuân Ngọc, Kwang atbồ Mpồl Kảñ sát gùng lòt ù gờl sồ 2 Kwang àng càr Dăk Lăk yal, lài do, pah ngai mìng geh pơgăp bơh 3 rơbô tus 5 rơbô nơm rơndeh lòt rê tàm Gùng dờng Dà lơgar 26 gơl lòt gan ală sàh bơh kơnhoàl Krông Pách (yau) dê lòt tus Buôn Ma Thuột. Tŭ do, khà rơndeh do neh gơguh rlau 10 rơbô nơm rơndeh lòt rê dồ ngai, tàm hơ̆ geh gĭt nđờ rơhiang nơm rơndeh continer mờ gĭt nđờ rơbô nơm rơndeh dờng, rơndeh pơndiang sầu riêng. Trung tá Lương Xuân Ngọc pà gĭt, tam pà gùng lòt rê tàm Gùng dờng Dà lơgar 26 tŭ do gam là kơnòl broă tờm bơh kảñ sát gùng lòt dê:“Bol añ neh rcang ai sùm 3 mpồl lơh broă ơm gak, tam pà gùng mờ bơto pơlam lòt rê tàm gùng tàm tŭ geh uă rơndeh lòt rê bơh 3 jiơ mho tus 7 jiơ mang pah ngai. Mơkung, tam pà kwang bàng tàm mpồl lòt mblàng yal, yal ai rlau 50 nă cau tờm anih ơn prap phan, rlau 150 nơm rơndeh Continer mờ pơgăp 200 hìu bơnhă làng bol geh rơndeh kông nông lơh jat jơnau sồr jun pơndiang sầu riêng lơngăp lơngai, gàr niam lòt rê tàm gùng niam pleh gơtìp gơkòl gùng lòt uă”.

Gùng dờng Dà lơgar 26 jòng 151 kơi sồ, là gơl gùng lòt rê tờm tàm tơrbŏ càr Dăk Lăk mờ Khánh Hoà, tàm tơrbŏ Gùng dờng Dà lơgar 1A mờ ală anih ơhò ơm dà lềng jun pơndiang phan lơh geh bơh broă lơh sa suơn sre tus mpồng tiah nhàr lơgar đah Tô Dà lơgar dê. Ồng Lương Huy Hoàng – Kwang lam bồ Kông ty kổ phần Atbồ mờ Bơt bơtàu gùng ù gờl 26 pà gĭt, gùng dờng Dà lơgar do geh bơcri priă lơh niam wơl bơh uă tŭ tơngai, den tàng geh gơl ơnàng 11 thơk, geh gơl ơnàng 9 thơk, bàr pe gơl gùng mìng ơnàng 6 thơk lơm. Rơndeh lòt rê gơguh uă nisơna tàm tŭ phan bơna bơt bơtàu ờ dồ ròt den tàng gơ kòl gùng là bơta ờ gơtùi pleh klàs ờ. Jat ồng Hoàng, kờñ bơsong jơh bơta do, pal pờ ơnàng gơl gùng gam wơl tus 11 thơk, lơh geh jơnau sồr gùng lòt kấp 2, mơya tŭ do kung ờ hềt geh ai priă bơcri lơh sơl. Ồng Lương Huy Hoàng, pà gĭt:“Bol añ neh lơh sră pơ àr dan mờ Anih duh broă Làng bol càr Dăk Lăk ai priă bơcri lơh nàng lơh niam wơl gơl gùng do. Tŭ geh lơh niam wơl, gùng rơ̆p tàm tơrbŏ sùm mờ gơl gùng rơndeh lòt mhar (Khánh Hoà – Buôn Ma Thuột) mờr tus, ƀuơn ngan ai broă tăc bro phan lơh geh bơh broă lơh sa suơn sre, is ồn là sầu riêng. Broă lơh niam wơl gơl gùng do kờñ geh pơgăp 800 tơmàn đong, khà priă do mìng ngui ai broă lơh gùng in lơm, gam gùng pleh neh geh rơndăp ù tiah lài den tàng ờ duh pal ai ù mờ tơm priă tai ờ”.

Tŭ Gùng dờng Dà lơgar 26 gơl bơh Buôn Ma Thuột lòt gan ală sàh Ea Knuếc, Krông Pách, Tân Tiến mờ Ea Phê (càr Dăk Lăk) geh bơcri priă lơh niam wơl tơl làm, den tàng gơl gùng do rơ̆p gơ gơs gùng tàm tơrbŏ kwơ màng tàm ală gùng lòt rê tàm càr Dăk Lăk dê, tàm tơrbŏ niam mờ gùng rơndeh lòt mhar sơn rờp tàm tơrbŏ brê mờ dà lềng Buôn Ma Thuột- Khánh Hoà mờr lơh sir mờ ai lòt rê. Ală gùng lòt rê geh lơh sir rơ̆p pờ geh gùng lòt jun pơndiang phan, tăc bro phan lơh geh bơh broă lơh sa suơn sre, is ồn là sầu riêng, mhar rlau tai, lơngăp lơngai rlau mờ ƀuơn rlau tai. Bơh do, tiah tờm sầu riêng bơh càr Dăk Lăk dê rơ̆p geh tai ală bơta nàng brồ guh lòt ngài rlau tai, cèng wơl cồng nha lơh sa uă rlau tai.