Lơh jat jơnau sồr lam lơh bơh Thủ tướng Cíñ phủ dê bè “500 ngai mang lơh 3 rbô kơi sồ gùng rơndeh lòt mhar” bơh nggùl nhai 8 nam 2024, ală cau tờm lơh rơndap broă tàm tiah lơh gùng rơndeh lòt mhar Khánh Hòa – Buôn Ma Thuột neh ai git nđờ rhiang nă cau chài măi mok, cau lơh broă mờ phan bơna lam lơh “3 ka, 4 kíp” sùm. Rơndap broă lơh jòng 117,5 kơi sồ, geh 4 bơnàng rơndeh, kờp jơh priă bơcri lơh mờr 2 rbô tơmàn đong, lơh ngan lơh gơs jơh gùt gơl gùng tàm lồi nam 2026 mờ ai lòt rê tàm bồ nam 2027.

Tus tŭ do, 2 gùng brong jòng rlau 1 rbô 700 thơk tàm gùng rơndeh lòt mhar tơrbŏ 2 càr Khánh Hòa mờ Dăk Lăk neh geh lơh, tàm hơ̆ gùng brong đah ma lơh geh 82% khà broă. Bơta jal mhar, jơh nùs tàm tiah lơh rơndap broă ai tơnggŏ bơta lơh ngan bơh cau bơcri priă mờ ală mpồl lơh rơndap broă dê tàm broă lam lơh jơnau kờñ rề ơnàng phan bơna gùng lòt kuơmàng dà lơgar dê.