Ồng Rơ Lan Lết ơm tàm ƀòn Klăh, sàh Ia Mơ, càr Gia Lai geh 2 nă kòn gam bơsram 2 ƀùi dùl ngai tàm Hìu bơsram kâp 1 mờ kâp 2 Nguyễn Văn Trỗi. Pah ngai, ồng pal 4 dơ̆ lòt jun lòt rò kòn, ai ală ngai ờ ru broă suơn mìr, ală oh pal coh is rơndeh rê tàm hìu sa ngai, bòl glar ngan. Bè hơ̆ den tàng, tŭ klo yal sàh Ia Mơ rơp geh bơcri mờr 200 tơmàn đong nàng lơh hìu bơsram ơm sa bic tơn 2 kâp tàm bă ù ơnàng 6 lồ jat kềng gah gùng càr 664, mờ wil tơl cơldŭ bơsram, cơldŭ ờs mòng, tiah ơm bic, hìu sa, ƀlàng nhơl bal mờ gùng che đèng, dà mờ geh mpồl lơh sơnơm hìu bơsram dê tai, ồng Lết ờ gơtùi pồn bơta chờ hờp.

Ồng pin dờn là, tŭ hìu bơsram pa geh lơh gơs, kòn ồng dê rơp geh anih ơm, anih sa tàm hìu bơsram tơn, mờ kung geh bơsram tàm anih dờng niam, pa rlau: “Đơs bè hìu bơsram, lài do neh niam rau. Tơngai tus, gơnoar atbồ ƀòn lơgar 2 kâp bơcri priă lơh hìu bơsram ơm sa bic tơn ai kòn sau he in, hìu bơsram pa den chờ hờp ngan bloh. Làng bol chờ hờp ngan, niam ngan”.

Ờ mìng mè bèp kơnòm bơsram, pơgru kung chờ hờp ngan. Pơgru Ngô Văn Vững, Phó kwang lam bồ drơng mờng chài Hìu bơsram kâp 1 mờ kâp 2 Nguyễn Văn Trỗi, sàh Ia Mơ pà git, tàm sàh geh uă hìu bơsram tŭ do ngài tus 18 kơi sồ, lơh kơnòm bơsram tiah ngài pal lòt gan gơl gùng jòng halà lòt tus càr ndai nàng bơsram. Bè hơ̆ den tàng, dilah geh hìu bơsram ơm bic sa tơn 2 kâp den rơp gơtùi bơsong bơta gàr sùm khà kơnòm bơsram lòt bơsram, tơnguh cồng nha bơto bơsram: "Chờ hờp ngan. Kờp dŭ hìu bơsram rơp geh hìu bơsram dờng, niam rlau, pa rlau, wil tơl phan bơna bơto bơsram, uă cơldŭ ờs mờng mờ hìu bơsram tŭ do gam ờ hềt geh. Bè hơ̆ den hìu bơsram rơp lam lơh bơto bơsram, ơm sa bic tàm dùl aniht ơn. Broă hơ̆ rơp dong tơnguh cồng nha bơto bơsram”.

Bal mờ sàh Ia Mơ, tŭ do, Anih duh broă Làng bol sàh Ia Púch, càr Gia Lai neh rơ wah ba ù 5 lồ tàm ƀòn Goòng, tiah do ƀuơn ngan bè gùng lòt rê nàng rơcang lài ù tiah ai broă lơh hìu bơsram ơm sa bic tơn 2 kâp ai rlau 730 nă kơnòm bơsram kâp 1 mờ kâp 2 in. Rơndap broă lơh rơp geh 24 cơldŭ bơsram, 14 cơldŭ ƀộ môn bal mờ hìu sền sră, cơldŭ pơlam hìu bơsram, hìu uă bơta kuơ, tiah tàp pràn să jan, hìu ơm bal, hìu ơm cau pơgru in mờ phan bơna măi mok ndrờm bal. Pơgru Phan Thành Tiến – Kwang lam bồ Hìu bơsram kâp 1 mờ kâp 2 Phù Đổng, sàh Ia Púch pà git: “Broă lơh hìu bơsram ơm sa bic tơn 2 kâp do niam ngan. Kơnòm bơsram là oh kòn ală cau lơh phan lơh broă tàm ală suơn dờng, jơnum lơh sa gal ngan. Bơdìh hơ̆ tai, khà kơnòm bơsram jơi bơtiàn dồ êt nă cau kung gal sơl, geh rlau 67%. Tŭ mờ lam lơh broă lơh ơm sa bic tơn 2 kâp, den dong ală kơnòm bơsram geh bơta ƀuơn bơsram sră niam rlau”.

Jat tơrgùm kờp, tiah nhàr lơgar đah mat tơngai mut càr Gia Lai tŭ do geh rlau 9 rbô 400 nă kơnòm bơsram. Tàm hơ̆ 54,65% là oh kòn làng bol jơi bơtiàn dồ êt nă cau. Jat jơnau lơh nền bơh Ƀộ Cíñ trị dê bè bơcri priă lơh ală hìu bơsram ơm sa tơn 2 kâp, kâp 1 mờ kâp 2 tàm 248 sàh tiah nhàr lơgar ù gờl tàm gùt lơgar, kờp dŭ càr Gia Lai rơp geh bơcri mờr 1 rbô 200 tơmàn đong nàng lơh tàm 7 sàh tiah nhàr lơgar đah mat tơngai mut.

Bơh nhai 7 nam 2025 tus tŭ do, Anih duh broă Làng bol càr Gia Lai neh sồr Sờh Bơto bơtê mờ Bơsram pơgồp bal mờ gơnoar atbồ tàm ƀòn lơgar lòt sền ù tiah ngan ngồn, bal mờ hơ̆ ală mpồl atbồ rơndap broă lơh mhar lơh sir sră nggal nàng rơcang lam lơh. Kờp dŭ, bàr pe broă lơh rơp geh lam lơh bơh lồi nam 2025 do tơn. Ồng Phạm Anh Tuấn, Phó Ƀí thư Tỉñ ủy, Củ tịc Anih duh broă Làng bol càr Gia Lai sồr ală sàh lơh mhar sră pơ àr bè ù tiah mờ hìu bơsram den rơp geh lam lơh gờñ: “Sồr ală mpồl, ală sàh lam lơh mơ ală sră pơ àr bè ù tiah, sră pơ àr tàm jàu, đo was, tơm wơl priă. Tềng đap mat ai ù nàng lơh hìu bơsram ơm sa bic tơn, lơh mơ tàm nhai 9 do tus nhai 10 tus tơn, nàng tŭ geh jơnau bơceh lơh bơh Ƀộ Bơt bơtàu dê den càr rơp lơh mơ”.

Mờ bơta pơnđơl ngan hơ̆, ală hìu bơsram dờng niam, pa tàm ù tiah nhàr lơgar kal ke bơh càr Gia Lai dê gam rơ hời gơ gơs ngan ngồn, lơh gơs dùl tơnơ̆ do bơsram sră niam rlau ai cau kơnòm să in.