Mpồl lơh broă bơh ƀòn dờng Hải Phòng dê neh mut tàm tiah dà kŏ dà cò Dăk Lăk nàng jàu phan pà dong kờl mờ gĭt nđờ ală bơta nàng geh broă rơndăp lơh geh ală bơta dong kờl geh ngan ai làng bol tiah dà tih dà lìu in. Ƀòn dờng Hải Phòng crăp rcang dong kờl 500 nă cau lơh sơnơm tus càr Dăk Lăk in bơsong ală broă bè sơnơm tơm ba tơnơ̆ ngơr bam dà, dà kŏ dà cò. Phó Củ tịc Anih duh broă Làng bol ƀòn dờng Hải Phòng neh jàu tai khà priă dong kờl 40 tơmàn đong, tơnguh khà priă ƀòn dờng dong kờl càr Dăk Lăk in tàm dơ̆ mìu dờng dà lìu dơ̆ do gơguh tus 50 tơmàn đong. Bal mờ hơ̆, Hải Phòng dong kờl ală phan bơna măi mok, sơnơm tơm ba, măi jồr dà... drơng broă lơh rcang lài kơryan kòp, rcang lài kơryan kòp bơtờp tơnơ̆ mìu dờng dà lìu, ngơr bam dà, dà kŏ dà cò kờp priă rlau 2 tơmàn đong.

Tềng đap mat, ƀòn dờng ai mpồl 21 nă cau gĭt wă jrô lam lài bè broă rcang lài kơryan kòp, kòp bơtờp... tus dong kờl càr Dăk Lăk. Ồng Nguyễn Minh Hùng đơs nền, ƀòn dờng Hải Phòng neh crăp rcang dong kờl ai càr Dăk Lăk in: “Tơnơ̆ tŭ geh jơnau đơs pơndŭt bơh Ƀộ Cíñ trị,  Ƀan ƀí thư dê den ƀòn dờng Hải Phòng neh geh gùng dà broă lơh dong kờl ai càr Dăk Lăk in. Tơnơ̆ dơ̆ mìu càr rơbŭt dờng, dà kŏ dà cò, dùl broă lơh kwơ màng ngan là broă lơh sàng goh tiah ơm kis mờ rcang lài kơryan kòp. Bol añ neh geh broă rơndăp lơh ngan ngồn bè broă rcang lài phan bơna sơnơm tơm ba, bè mpồl cau. Bol añ neh rcang mờ crăp rcang dong kờl bơh 300 tus 500 nă cau lơh sơnơm nàng bal mờ càr Dăk Lăk lơh broă lơh rcang lài kơryan kòp kung bè sơm kòp”.

Ƀòn dờng Hồ Chí Minh neh hòi jà tơrgùm jơh bơta pràn nàng dong kờl Khánh Hòa in tơnơ̆ mìu dờng dà lìu, bơh kham kòp- pà sơnơm ờ sa priă, pà phan sa, phan ngui, pơs wàs tiah hìu ơm tus lơh niam wơl hìu bơsram, hìu sơnơm mờ gàr geh sùm hìu bềp sa piang ờ sa priă ai làng bol tiah ngơr bam dà in. Mpồl neh tus ală tiah ngơr jrô dà tàm Nha Trang, Diên Khánh, Khánh Vĩnh.

Ƀák sìh Phạm Minh Công, Mpồl ƀák sìh kơnòm să ƀòn dờng Hồ Chí Minh, pà gĭt, ală cau lơh sơnơm tàm mpồl neh dờp kơnòl mờ lòt gùng mhar ngan, mơya kung rcang tơl lài ai broă kham sơm kòp tàm tiah dà tih dà lìu in:“Tàm tơngai lơyah ngan, bol añ neh crăp rcang, tơrgùm mpồl lòt gùng mơ tơn tàm trồ mang. Kơ̆p kờñ tam pà bal, dong kờl dùl bơnah kal ke bòl glar mờ làng bol. Kung là dong kờl tai nùs nhơm ai làng bol tiah dà kŏ dà cò in sơr lèt gan kal ke”.

Bal mờ hơ̆, mpồl gam pờ bàr pe hìu bềp ing, pà bơh 10 rơbô 12 rơbô bơnah phan sa dùl ngai nàng drơng làng bol ală sàh, sơnah ƀòn gơtìp hoàc huơr kơn jơ̆ mờ mpồl dong kờl in. Ală drà pa Co.opmart – Ală Mpồl lơh broă bal Kă bro phan ƀòn dờng Hồ Chí Minh tàm Nha Trang mhar ngan blơi phan, gàr niam broă ờ tơnguh giă, ờ gŏ di lời ờ tơl phan bơna tàm tơngai gơ jal ngan do. Ồng Nguyễn Phước Lộc, Phó Ƀí thư Thàñ ủy ƀòn dờng Hồ Chí Minh đơs nền, ƀòn dờng rơ̆p pơn jat tai dong kờl Khánh Hoà geh broă lơh di broă, di anih, jat tàm bơta lòt sền ngan ngồn; mơkung ai tai mpồl pơgồp bal lơh niam wơl phan bơna bơt bơtàu kwơ màng:“Ală mpồl lơh broă lòt sền, dong kờl lơh niam wơl jơh ală hìu bơsram mờ hìu sơnơm gơtìp ờ diơng, gàr niam ai kơnòm bơsram in gờñ wơl lòt bơsram tàm ơdŭ bơsram mờ hìu sơnơm lơh broă bè ờs wơl”.

Lơh jat jơnau hòi jà bơh Anih duh broă Mặt trận Dà lơgar Việt Nam càr Dăk Lăk, tàm ală ngai do, uă anih lơh broă, mpồl lơh broă bal mờ gĭt nđờ rơbô nă làng bol tàm tiah đah mat tơngai mut càr neh tă pơgồp bal gĭt nđờ rơhiang phan ngui sa kwơ màng, dà hùc, ào mpha... pơyoa dong kờl làng bol tiah dà kŏ dà dò tàm tiah đah mat tơngai lik in. Ồng Y Giang Gry Niê Knơng, Phó Ƀí thư Tỉñ ủy càr - Củ tịc Anih duh broă Mặt trận Dà lơgar Việt Nam càr Dăk Lăk pà gĭt, broă lơh dờp mờ tam pà phan dong kờl kung geh lam lơh mhar ngan:“Mờ bơta tam klăc bal tàm sơm bat tê bal bơh làng bol tàm càr mờ bơdìh càr, hòi jà ală tiah làng bol ơm kis, ală gah pin dờn jat Yàng trŭ gơm piang hộp, klơm mbar lơm pòng,... nàng jun pơndiang di tŭ pơyoa tus làng bol tiah gơtìp tam cah is, tiah dà wềl in. Bơdìh mờ hơ̆, bol añ kung pơn jat tai hòi jà, dờp bal mờ priă mat mờ phan sa, phan ngui, phan bơna dong kờl làng bol gờñ bè ờs wơl rài kis”.