Cơl dŭ lơh broă Đảng Dà lơgar pa ai lơh jăt Jơnau yal Jơnau đơs pơn dŭt bơh Tổng Ƀí thư ồng Tô Lâm dê tàm dơ̆ lơh broă mờ Ƀộ Broă dơlam is bè mpồl lơh broă sa dà lơgar lơh jăt kơnòl bơto pơlam broă lơh sa suơn sre tàm ƀòn lơgar tŭ lơh jăt broă lơh gơnoar atbồ ƀòn lơgar 2 kấp. Jăt mờ hơ̆, Tổng Ƀí thư sồr lơh jăt mờ git tơl bè gơnoar, bơta kwơ màng bơh lơh sa suơn sre bal mờ kơnòl bơtàu tơnguh lơh sa suơn sre tàm broă bơtàu tơnguh lơh sa mpồl bơtiàn, bơ̆t bơtàu ƀòn lơgar pa, tơnguh uă rài kis Làng bol di jăt nùs nhơm “broă lơh sa suơn sre là bơta kwơ dà lơgar dê, là bơta tờm dong kờl bơh lơh sa dê”; ai geh broă bơto pơlam broă lơh sa suơn sre là kơnòl kwơ màng bơh gơnoar atbồ kấp sàh dê.

Bè broă bơyai lơh, tàm kấp càr, ƀòn dờng geh sùm ală Anih Bơto pơlam broă lơh sa suơn sre, mìng lơh kơnòl broă bơto sồr, pơlam, lam lơh, sền gròi mờ dong kờl kấp sàh. Ờ bơyai lơh ală Anih bơto pơlam broă lơh sa suơn sre tàm ală tiah, tàm ală sàh. Kấp sàh lơh geh mpồl lơh broă dà lơgar lơh jăt broă lơh drơng ala dà lơgar tờm geh kwơ uă gah broă. Tàm tơngu me kwang bàng bơto pơlam broă lơh sa suơn sre ală kấp tŭ do geh, rơ̆p tam pà tus ală sàh nàng tơl sàh geh bơh 5 tus 6 nă kwang bàng bơto pơlam broă lơh sa suơn sre, ờ tơnguh khà kwang bàng lơh broă bơto pơlam broă lơh sa suơn sre. Pơn jăt tai lơh, tơnguh uă cồng nha broă lơh bơh ală Mpồl bơto pơlam broă lơh sa suơn sre mpồl bơtiàn, tơnguh broă mblàng yal jơnau git wă, broă lơh mờng chài lơh sa, dong kờl, bơto sồr làng bol pơgồp bal bơtàu tơnguh lơh sa suơn sre. Ală tiah lơh jăt broă rơndăp tăp sèng lơh geh mpồl lơh broă kấp sàh lài mờ ngai 30 nhai 10 nam 2025.