Mho ngai 13/10, Pơrjum dờng Đảng ƀộ Cíñ phủ dơ̆ 1 neh pơrjum dar tơn jơh. Pơrjum dờng neh ring bal Jơnau lơh nền tàm pơrjum mờ 100% cau ala mat ring bal. Jơnau lơh nền tàm Pơrjum dờng neh ai tơnggŏ bơta kơp kơnờm, bơta lơh ngan bơh Đảng ƀộ Cíñ phủ dê tàm tŭ tơngai lơh broă pa mờ bơta pơnđơl pràn “Bơt bơtàu Đảng ƀộ Cíñ phủ sàng goh kơnhăp pràn kơldang; tam klac, lơh krơh, lòt lài tàm jak chài măi mok, tam gơl pa bơceh lơh, tam gơl sồ; tơngguh mhar tam gơl pràn, bơtàu tơnguh dà lơgar mhar mờ kơ̆ kơnhăp tàm rài brồ să pas sơm, pràn kơldang, bơtàu tơnguh, gơguh jak, gơboh gơbài”. 

Tơrgùm đơng lam, sồr lam lơh jơh nùs, ndrờm bal, geh cồng nha ală jơnau kờñ lơh geh, broă jàu geh ai tơlik mờ 4 mpồl broă bè bơt bơtàu Đảng; 8 mpồl broă lơh bè bơtàu tơnguh lơh sa, mpồl bơtiàn; 2 mpồl broă lơh bè sền gàr dà lơgar, lơngăp lơngai, lơh broă mờ lơgar ndai; 6 kơnòl broă tờm bè ală tam gơl pràn kuơmàng. Kơ̆ dơn jơnau kờñ lơh geh kơ̆ kơnhăp sùm broă lơh sa dờng, gròi sền bơta roh giă priă, gàr niam ală jơnau tàm pơndring dờng bơh rài lơh sa dê; chồl tơnguh gơguh GDP kờp bal geh 10% pah nam rlau hơđang. Pơn jat tai lơh sir adat boh lam, kơrnuat boh lam; bơtàu tơnguh rơndap tap sèng phan bơna ndrờm bal,  pa ngan mờ cau lơh broă geh bơta niam uă. Chồl tơnguh pràn kơldang lơh sa mờ măi mok, tam gơl pa, rơndap tap sèng wơl rài lơh sa đal git broă lơh gơguh lơh sa pa, bơtàu tơnguh pràn jak chài măi mok, tam gơl pa bơceh lơh mờ tam gơl sồ. Sền gròi tus ală gah niam chài, mpồl bơtiàn, sền gàr tiah ơm kis, tơnguh niam rài kis làng bol. Pơn jat tai lơh kơ̆ kơljap, sơlơ tơnguh tai sền gàr dà lơgar, lơngăp lơngai, gàr niam rơndap tap sèng, ring lơngai mpồl bơtiàn; tơnguh cồng nha lơh broă mờ lơgar ndai, mut gơ rờm bal ală lơgar, sền gàr tiah ơm kis ring lơngai, kơ̆ kơnhăp ai bơtàu tơnguh dà lơgar mhar mờ kơ̆ kơnhăp sùm in.