Tàm càr Khánh Hoà, tơnơ̆ rơlao 5 nhai ngui KPI – Khà was cồng nha broă lơh – pà gŏ, KPI ờ ơm wơl tàm ală khà kờp tàm măi tính mờ gam là phan was bơta niam broă lơh bơh cau dùl nă să bal mờ mpồl cau dê. Ồng Phạm Minh Nhựt, Củ tịc Tơrgùm ală mpồl Lòt nhơl Nha Trang Khánh Hoà đơs bè do: “Broă ngui KPI tàm ală gah broă lơi kung cèng geh cồng nha. mờ kwang bàng tŭ ngui ală khà broă, cau lơi kung pal wă loh să tờm pal lơh broă lơi, lơh bè lơi. Tŭ cau bơsong broă lơh wă pal lơh bè lơi mờ pal lơh bè lơi nàng niam den dong kờl cau geh dờp broă lơh hơ̆ geh bơsong mhar rơlao”.

Kơnờm KPI, kwang đơng lam bồ càr neh git loh tơngai lơh broă bè ờs pah ngai bơh ală anih lơh broă, mpồl lơh broă. Bè, mpồl Anih lơh broă gơwèt Tỉñ ủy, Mặt trận Dà lơgar Việt Nam càr, Đảng ủy mpồl ală Anih lơh broă Đảng mờ kấp ủy gơwèt bal geh 4,97 jơ, mpồl gơnoar atbồ kấp càr 6,13 jơ; ală mpồl lơh broă 6,11 jơ; Đảng ủy ală sàh, sơnah ƀòn 5,21 jơ; mờ Anih duh broă Làng bol kấp sàh 6,17 jơ. Tàm Mpồl Atbồ Tiah lơh sa mờ Lơh sa mờ măi mok càr Khánh Hoà, Lam bồ mpồl ồng Trần Minh Chiến pà git, bơh KPI, bơta niam broă lơh neh loh làng bè pang rùp: “Bơh KPI rơ̆p lơh geh bơta niam jơh, kwang bàng sền gŏ broă bè pang rùp lơh jăt kơnòl broă tơrgùm bal bơh  anih lơh broă. Khà cau lơh broă ờ gơguh, broă lơh ngai sơlơ uă. Den tàng, pal tơnguh cồng nha lơh broă mờ broă bơto, ngui măi mok pràn kơl dang rơlao”.

Càr Khánh Hoà tơnơ̆ tơrgùm bal gam ai geh ală khà broă lơh uă ngan: Khà gơguh lơh sa GRDP tơl nă bơh 11% tus 12% tàm 1 nam; GRDP tàm dùl nă cau gơwèt Mpồl 10 gùt lơgar; lơh sa sồ geh 35% GRDP; khà tiah drà jơh geh 70%. Bơta lòng geh bal uă: bàr tiah gơkòl dờng bè phan bơna jŏ jòng (is ồn là phan bơna sồ) mờ cau lơh broă geh bơta jăk uă, bal mờ jơnau kờñ tơnguh bơta jăk kwang bàng. Den tàng, KPI là phan nàng was jơh, jăt sền broă lơh jăt ală jơnau kờñ do, lơh broă lơh ngan gơs khà kờp loh làng.

Ƀí thư Tỉñ ủy càr Khánh Hoà, ồng Nghiêm Xuân Thành đơs nền KPI rơ̆p là phan atbồ mờ kung là phan tơrbŏ bal đah jơnau kờñ mờ cồng nha lơh jăt pah ngai: “Broă ngui KPI rơ̆p pà gŏ khà cau lơh broă pal geh. Sền khà jơ rơ̆p git mpồl lơh broă gam jơnkah ha là ờ tơl nđờ nă kwang bàng, gam jơnkah nđờ nă kwang bàng, jơnkah tàm mpồl lơh broă lơi”.

Càr Khánh Hoà là tiah lam lài den dà lơgar là tiah tus ngui KPI kwang bàng. Ƀộ Broă dơlam is neh ai geh broă rơndăp lơh KPI ndrờm bal tus tàm gùt lơgar bơh bồ nam 2026, pơgồp bal mờ broă tam gơl sồ. Tŭ zữ liệu geh tơrgùm jăt tơngai mùl màl, dùl pang sră jơla tơngai ờ gam mìng ơm wơl tàm jơnau mblàng, mờ geh cơng tàng mùl màl tàm mpồl phan lơh broă, ai broă lơh sră pơ-àr gơnoar atbồ dà lơgar gơs tiah tàm pơrlòng loh làng. Ƀộ trưởng Ƀộ Broă dơlam is mò Phạm Thị Thanh Trà đơs tờm: “Cíñ phủ rơ̆p tơlik jơnau geh ai loh làng bè jơnau sền kwang bàng, kông cứk, viên cứk. Ală broă jàu sền swì rơ̆p geh lơh jăt tàm bơta ngui măi mok, pơgồp bal KPI mờ bơta krơi is bơh lơh broă dà lơgar Việt Nam dê, pơgồp bal mờ anih broă lơh, gàr loh làng, ndrờm bal mờ mùl màl. Do là cơng tàng nàng lơh jăt jơnau pal jăt, ờ gam bồ tơngoh kơlôi sơnơng “cau lơh broă sa priă nhai dà lơgar tus jơh rài kis”.

Là dùl anih sền sơwì song dơ pă, Sơñio khà đo was cồng nha broă lơh – KPI mờ càr Khánh Hoà gam ngui ờ mìng ai tơngŏ bơta jăk broă lơh mờ lơh ngan bơh mpồl lơh broă, cau dùl nă să dê. Jăt Phó Củ tịc Quốk hội mò Nguyễn Thị Thanh đơs, do gam là phan ngui chồl tơngguh làng bol lơh tờm tàm kâp hơđơm: “Càr Khánh Hoà là dùl tàm ală càr lam lài tàm broă bơ̆t bơtàu KPI nàng sền git, bơ̆t bơtàu anih lơh broă. Tiah lam lài tàm broă lơh jăt ală tơngu me pa ngan bè lơh jăt broă lơh tờm, mờ bơtơl tơngu me pa ngan ai phan lơh broă lơh tờm tàm tơngai tam gơl sồ in”.

Bơh tàm sàh tus càr, tus dà lơgar, Sơñio khà đo was cồng nha broă lơh – KPI gam lơh geh ală bơta pràn pa tàm bơta niam chài mờ cồng nha kơnòl broă. Tàm jơnau rơcang cih Jơnau yal Cíñ trị Pơrjum dờng Đảng ƀộ càr Khánh Hoà dơ̆ I, KPI geh đơs nền là phan ngui măy mok tờm nàng lơh jăt ngan ngồn jơnau kơ̆p kờñ ngan: gơs tiah gơguh lơh sa pràn gùt lơgar dê, tus nam 2030 là ƀòn dờng gơwèt Dà lơgar dê, tiah tờm lòt nhơl – broă lơh drơng ala dà lềng ală lơgar. KPI geh đơs uă tàm 3 bơta tờm: Lam lài tàm broă kwang bàng; Lơh gơlik geh tam gơl mùl màl tàm broă sền đơs, rơndăp khà; mờ Ngui ndrờm bal tàm jơh ală anih lơh broă cíñ trị, gàr niam song dơ pă, loh làng. Do kung ngan là broă gơguh sơnrờp ngan nàng rài lơh broă lơgar Việt Nam dê rềp rơlao mờ ală ală jơnau sồr pal jăt pa, lơh broă mờng chài mờ geh cồng nha.

Sền jơnau cih dơ̆ I tềng do:

https://vov4.vov.vn/kho/jonau-tongit-mpol-botian-thoi-su-xa-hoi/rot-jonau-cih-kpi-bota-gon-konom-loh-tam-gol-pa-wol-boh-khanh-hoa-de-tus-gut-logar-jonau-cih-1-khanh-hoa-loh-lai-ngui-kpi-boh-nus-nhom-is-tus-ala-jonau-yal-song-do-pa-loh-lang-496693.vov4