Tàm tơngai lơh broă bơh nam 2020- 2025, lơh sa mờ măy mŏy mờ năng lượng neh lơh gơlik geh tềl lời wơl mpờl loh ngan tàm Khánh Hoà, pơgồp bơnah tơngguh priă lơh geh kờp bal dùl nă cau geh rlau 113 tơlak đong dùl nam. Lơh sa mờ măy mŏk tàm Vân Phong, năng lượng tàm tiah đah Jum Khánh Hoà rơhời jăt bàn mờ lòt nhơl Nha Trang mờ Cam Lâm. Ală tềl sơñio do pà gŏ, lơh sa mờ măy mŏk mờ năng lượng gam rơhời gơgơs bàr broă pa, ai Khánh Hoà mŭt tàm “tơngai 10 nam gơguh bàr nơm khà”.

Jơnau rơcăng cih Jơnau yal cíñ trị sền Pơrjum dờng Đảng ƀộ càr Khánh Hoà dơ̆ sơnrờp, tơngai lơh broă bơh nam 2025- 2030 đơs sùm, nàng mùl màl lơh niam broă lơh sa mờ măy mŏk mờ năng lượng, kờñ pal “lơh pràn rơndăp tăp sèng wơl, tam gơl pa mờ tơngguh uă cồng nha mpồl lơh sa kă bro dà lơgar jăt gùng dà broă lơh drà kă bro, lơh geh tơl ală jơnau sồr ală lơgar dê bè ătbồ broă”. Bơta do kung ring bal mờ bơta wèt sền bơtàu tơngguh bơh ală mpồl lơh sa kă bro dê tàm càr. Mò Trịnh Thị Hồng Vân, Củ tịc Kông ty Bar bèt chàng Khánh Hoà, yal: “Kông ty rơ̆p ai gah broă lơh bar bèt chàng gơgơs broă lơh tờm, kwơmàng ngan. Kông ty rơ̆p tơrmù dipal, tơmŭt bal, tơn lời lơh broă ală mpồl lơh broă lơh broă ờ geh cồng nha. Bol hi rơ̆p lơh pràn tam gơl sồ. Is ồn, gah lơh gơlik phan pơn jăt tai bơcri măy mŏk phan ngui pa nàng lơh geh jơnau kờñ”.

Bal mờ lơh niam ală bơta pràn lơh sa mờ măy mŏk ờs mờng bơh yau, càr Khánh Hoà geh jơnau kờñ gơhòi gơ jà rơndăp broă lơh măy mŏk pa bè phan crăp điện tử, ƀán zẫn, bồ tơngoh jak kòn bơnus dê lơh, anih tờm jơnau yal tơngĭt dà lơgar. Nàng lơh geh tus jơnau kờñ do, càr pơgồp bal mờ Dà lơgar lơh sir niam gùng, tàm tơrbŏ bal bơh ƀlàng rơndeh par ală lơgar Vân Phong, Cam Ranh tus gùng rơndeh lòt mhar đah Tô – đah Jum, đah măt tơngai Lik – Mŭt mờ gùng rơndeh ồs lòt mhar ngan. Ồng Trần Minh Chiến, Lam bồ Mpồl ătbồ Tiah lơh sa mờ Tiah lơh sa mờ măy mŏk càr Khánh Hoà pin dờn, tŭ càr neh crăp rơcăng ù goh, ồs đèng – dà geh sùm, drơng broă dong kờl wil tơl, cau bơcri priă rơ̆p iang nùs tă priă bơcri jŏ jòng.

“Ƀươn ƀoài là ală rơndăp ù tiah tam pà tiah neh geh sền swì ring bal. Jơh gùt càr Khánh Hoà là dùl nơm ơhò, Mpồl ătbồ Tiah lơh sa mờ Tiah lơh sa mờ măy mŏk càr Khánh Hoà là dùl broă lơh tờm, pơgồp bơnah nàng Khánh Hoà gơguh 2 nơm khà. Jơnau kờñ là bè hơ̆ mơya pal săc rwah geh cau bơcri priă geh tơl pràn, rơndăp broă lơh pal gơcèng bơta gơtùi lơh ngan ngồn”. 

Lòt bal mờ lơh sa mờ măy mŏk, là broă năng lượng. Tơnơ̆ tŭ tơrgùm dùl, bơta pràn do bơh Khánh Hoà dê sơlơ pơnrơ ngan. Càr geh jơnau kờñ bơtàu tơngguh pràn đèng càl tàm dà lềng, đèng măt tơngai, đèng nhơm LNG mờ đèng hạt ñân, gơ jăt bal mờ ală gùng che jun đèng pa. Is ồn, bàr rơndăp broă lơh đèng hạt ñân tàm đah Jum Khánh Hoà geh sền là geh bơta pràn kwơmàng dà lơgar, pờ tơlik ai Khánh Hoà in ù tiah bơtàu tơngguh pa, gơ jăt bal mờ lơh sa mờ măy mŏk dong bơtơl, drơng broă măy mŏk mờ bơto cau lơh broă geh broă lơh jak uă. Ồng Hồ Xuân Ninh, Kwang Lam bồ Sờh Kă bro phan mờ lơh sa mờ măy mŏk càr Khánh Hoà pà gĭt, càr gam tơrgùm jơh pràn ai rơndăp broă lơh is ồn kwơmàng do in: “Tŭ do, broă tơm priă ai ù ờ gŏ di là broă dờng, sền bal rơ̆p lam lơh mhar ngan. Lơh geh jơnau sồr tŭ tơngai pờ đèng, gàr niam ai lơh gơlik mờ ngui sa in. Kờñ pal sền gròi ai mpồl cau lơh broă geh broă lơh jak uă in, lơh geh jơnau kờñ ai ală mpồl lơh sa kă bro in”.

Nàng lơh geh ngan ngồn jơnau kơ̆p kờñ ngan tơngguh broă bơtàu tơngguh gơ wèt mờ lơh sa mờ măy mŏk mờ năng lượng, càr Khánh Hoà sồr lơh uă broă lơh: lơh tam gơl pa wơl sră nggal sră pơ àr gơnoar ătbồ, tơn rŭc lơyah tŭ jiơ lơh sră ai gơnoar; hòi tơrgùm bơta pràn mpồl bơtiàn, pơn jờng lơh broă bal dà lơgar mờ làng bol tàm bơtàu tơngguh phan bơna, năng lượng, jak chài măy mŏk mờ tam gơl sồ; sền dờng màng bơto cau lơh broă bơta chài uă; ngui KPI, tơngguh uă kơnòl mblàng lơh loh bơh ală anih lơh broă Dà lơgar dê, lơh gơlik geh bơta ƀươn ƀoài nàng mpồl lơh sa kă bro mùl màl gơgơs mpồl lam bồ bơtàu tơngguh. Ƀí thư Tỉñ ủy càr Khánh Hoà ồng Nghiêm Xuân Thành đơs sùm: “Nàng càr Khánh Hoà gơguh 2 nơm khà, tơngguh rề dia kơnhăp jŏ den ờ gŏ geh gùng lơi ndai là lơh sa mờ măy mŏk. Dilah lơh sa mờ măy mŏk  ờ geh broă lơh tam gơl pràn, ngan ngồn rơ̆p ờ lơh sir geh jơnau kờñ do”.

Lơh broă mờ Mpồl Lơh kơnòl broă sùm Tỉñ ủy càr Khánh Hoà, Củ tịc Quôk hội ồng Trần Thanh Mẫn đơs niam ngan pơlam gùng bơh càr dê ai tơnơ̆ do bơtàu tơngguh pa in: “Bơta ƀươn bơh càr Khánh Hoà dê tơnơ̆ tơrgùm dùl. Hơ̆ là bơta pràn krơi is, bơta ƀươn tàm pơrlòng, ù tiah mờ gơn kơnờm bơtàu tơngguh pa. Ngan là bè lơh sa dà lềng, lòt nhơl mờ drơng broă ala, logistics, anih ơhò dà lềng ơm, lơh sa mờ măy mŏk lơh gơlik phan mờ lơh mòn, năng lượng lơh geh wơl, năng lượng kloh, anih tờm jơnau yal tơnggĭt. Pal sền swì jơh bơta, tơngguh tai ală bơta pràn, bơsong mơ tơn ală bơta ờ pràn”.

Khánh Hoà gam mŭt tàm dùl gùng lòt pa, bal mờ lơh sa mờ măy mŏk mờ năng lượng là bàr broă dờng. Do ờ mìng là jơnau kờñ bơtàu tơngguh lơh sa lơm mờ gam là broă rơndăp lơh gĭt nền broă lơh càr dê tàm bơta mŭt gơrờm bal mờ ală lơgar, wèt tus bơngă tiah tờm lơh sa mờ măy mŏk, năng lượng kloh mờ tiah drà pa ngan tàm nam 2030, mơkung pơgồp bơnah lơh jăt broă rơndăp lơh gàr tơl năng lượng dà lơgar in.